“Türkiyənin öz təhlükəsizliyinə qarşı bütün təhdidləri mənbəyində həll etmək gücü və hər şeydən əvvəl qətiyyəti var”. Bu sözləri Türkiyənin xarici işlər naziri Hakan Fidan terror təşkilatı PKK/YPG-nin fəaliyyətindən danışarkən deyib. Türkiyə diplomatiyasının rəhbəri İstanbulda yerli və xarici KİV nümayəndələrinin iştirak etdiyi tədbirdə çıxış edərkən vurğulayıb ki, “separatçı terror təşkilatı PKK/YPG və onun Suriyadakı qolu üçün yolun sonu artıq yaxındır”.

Baş diplomat həmçinin qeyd edib ki, Ankara “ABŞ-ın gücündən istifadə edərək Suriyada öz maraqlarını irəli sürməyə çalışan və onun arxasında gizlənən ölkələri (Fransa kimi) nəzərə almır”.

Xarici işlər naziri xatırladıb ki, Türkiyə PKK/YPG kimi bir təhlükənin mövcudluğuna dözmək niyyətində olmadığını dəfələrlə bəyan edib: “PKK/YPG-yə qarşı lazımi addımlar ya başqaları, ya da bizim tərəfimizdən atılacaq. Heç bir şey əvvəlki kimi olmayacaq”.

Fidanın sözlərinə görə, Suriya ərazisinin terrordan təmizlənməsi 2025-ci ildə Türkiyənin əsas prioritetinə çevriləcək. Nazir qeyd edib ki, bölgədə fəaliyyət göstərən bütün terror təşkilatlarının əsas hədəfi hər zaman Türkiyə olub.

Fidan terrorla mübarizədə "ikili mövqe" nümayiş etdirən ölkələri son hücumlardan dərs almağa çağırıb.

Eyni zamanda Xarici İşlər Nazirliyinin rəhbəri vurğulayıb ki, terrorun dini və milli mənsubiyyəti yoxdur. Onun sözlərinə görə, bütün beynəlxalq ictimaiyyət “terror təşkilatlarının Avropa, Amerika və ya Türkiyə arasında fərq qoymadığını” qəbul etməlidir.

Diplomat ölkəsinin “Terrorsuz Türkiyə” məqsədinə nail olacağına əminliyini ifadə edib.

Görünən odur ki, Türkiyə Suriyada PKK-çıları birdəfəlik “təmizləmək” niyyətində qətidir. Bunu həm nazirin bəyanatı, həm də Türkiyə ordusunun hazırlıqları deməyə əsas verir. Belə ki, Suriyada PKK terrorçularına qarşı mümkün əməliyyatla əlaqədar Türkiyə Silahlı Qüvvələri döyüş hazırlığı vəziyyətinə gətirilib. Bu barədə hökumətyönlü Türkiyə media orqanları hərbi mənbələrə istinadən məlumat yayıb. Bildirilir ki, Ankara Suriyanın yeni hakimiyyət orqanlarından PKK-ya qarşı lazımi tədbirlərin görülməsini tələb edib.

Məlumatda vurğulanıb ki, Türkiyə indi hadisələrin istənilən nəticəsinə, o cümlədən hərbi əməliyyata hazırlaşır, Suriya ilə sərhəddəki qoşunları mümkün əməliyyat üçün döyüş hazırlığına gətirilib.

Onu da bildirək ki, yanvarın 7-də Fidan Suriyadakı PKK üterrorçularına xəbərdarlıq edib. Onun sözlərinə görə, hakimiyyət PKK təmsilçilərindən silahı yerə qoyaraq Suriya ərazisini tərk etməyi tələb edib. Bu təklifə məhəl qoyulmasa, Ankara hərbi əməliyyatlara başlaya bilər.

ABŞ dövlət katibi Antoni Blinken isə bildirmişdi ki, ABŞ türk qoşunları ilə kürd yaraqlıları arasında münaqişənin gərginləşməsinin qarşısını almağa çalışır. Blinken qeyd edib ki, Türkiyənin Suriyada fəaliyyət göstərən PKK yaraqlıları ilə bağlı “qanuni narahatlıqları” var.

Ayna.az