Mingəçevirdə fəaliyyət göstərən və bölgədə ilk müstəqil teatr kimi tanınan Modern Teatr aktyorluq dərnəyinin yarımillik tədris proqramını uğurla başa vuran iştirakçılar üçün sertifikat təqdimetmə mərasimi keçirib.

Tədbirdə bildirilib ki, yarım il ərzində dərnək fəaliyyətinə məsuliyyətlə yanaşan, müxtəlif dövlət tədbirlərində fəallıq göstərən və davranışları ilə nümunə olan dərnək üzvlərinə sertifikatlar təqdim olunub. Onlara gələcək təhsil və yaradıcılıq fəaliyyətlərində uğurlar arzulanıb. Həmçinin qeyd olunub ki, gənclərin Modern Teatrda hazırlanacaq yeni səhnə layihələrində və yaradıcılıq işlərində iştirak etmələri tövsiyə edilir.

Mərasimdə teatrın bədii rəhbəri, tanınmış kino və teatr rejissoru, “Tərəqqi” medallı və Prezidentin fərdi mükafatçısı Cavid Təvəkkül, Mingəçevir Dövlət Dram Teatrının dram artisti, Prezident mükafatçısı və Modern Teatrın ictimai əsaslarla üzvü İbrahim Türksoy Salamov çıxış edərək dərnək üzvlərinə uğurlar arzulayıblar.

Təqdimat mərasimində Mingəçevir Dövlət Dram Teatrının əməkdaşları da iştirak ediblər.

Çıxışlar zamanı Modern Teatrın yarandığı gündən etibarən fəaliyyətinə göstərilən dəstəyə görə Mərkəzi Aran Regional Mədəniyyət İdarəsinin rəisi Namiq Tarverdiyev, Mingəçevir Dövlət Dram Teatrının sabiq direktoru Vəfadar Rəhimova, hazırkı direktor Şəlalə Sadəddinova, teatrın truppa rəhbəri Könül Hacıyeva, texniki işlər üzrə rəhbər Ramin Piriyev, eləcə də teatrın yerləşdiyi 1 nömrəli Musiqi Məktəbinin direktoru Vüsal Məmmədovaya təşəkkür ifadə olunub.

Qeyd edilib ki, Modern Teatrın əsas heyəti arasında musiqi və incəsənət məktəblərinin müəllimləri ilə yanaşı, peşəkar aktyorlar da yer alır.

Tədbir zamanı həmçinin Azərbaycan Respublikasının mədəniyyət naziri Adil Kərimlinin Mingəçevir Modern Teatrının fəaliyyətinə gələcəkdə də diqqət və qayğı göstərəcəyinə inam ifadə olunub.