"Gəncənin mərkəzə yaxın ərazisində bir yol var ki, onun vəziyyəti artıq sadəcə yol problemi deyil, uzun illərdir həll olunmayan biganəliyin göstəricisinə çevrilib..." Bu barədə "DİA-AZ"a göndərilən məqalədə deyilir.
Məqalədə daha sonra deyilir: "Söhbət Gəncə şəhərində KTV-nin yaxınlığında, sakinlərin “Türkün pivonoyu” adlandırdığı ərazidə, avtomobillərin artezian suyu doldurduğu məntəqənin, Fikrət Əmirov adına parkın yaxınlığında yerləşən dördyoldan gedir. Yolun yaxınlığında böyük parkın yerləşməsi də həmin ərazidə hərəkətin kifayət qədər intensiv olduğunu göstərir.
Ən təəccüblüsü isə odur ki, bu yolun vəziyyəti 10 ildən artıqdır dəyişmir. Yol çala-çuxur içərisindədir, asfalt örtüyü demək olar ki, sıradan çıxıb. Sürücülər hər gün avtomobillərini bu çuxurlardan keçirməyə məcbur olurlar.
Vəziyyət o həddə çatıb ki, sakinlər artıq problemi öz imkanları hesabına həll etməyə çalışırlar. Evlərində təmir aparan insanlar gips, beton və digər tikinti qalıqlarını gətirib yoldakı çala-çuxurlara tökürlər ki, heç olmasa avtomobillər keçə bilsin. Ancaq bu “təmir” bir neçə gün davam edir və yol yenidən əvvəlki vəziyyətinə qayıdır.
Bu mənzərə bir çox suallar doğurur: Bir şəhər yolunun təmirini sakinlər öz üzərinə götürməlidirlərmi? İnsanlar nə vaxta qədər evlərindən çıxan tikinti tullantıları ilə şəhərin yollarını düzəltməyə çalışacaqlar?
Yolun vəziyyəti avtomobil sahiblərinə də ciddi ziyan vurur. Dərin çala və çuxurlardan məcburi keçid avtomobillərin asqı sisteminin, təkərlərinin və digər hissələrinin sıradan çıxmasına səbəb olur. Yağışlı havalarda isə problem daha da böyüyür. Çuxurlar su ilə dolur və yol gölməçəyə çevrilir. Sürücü isə suyun altında hansı çuxurun və nə qədər dərin olduğunu görə bilmir.
Məsələ ilə bağlı aidiyyatı qurumlara dəfələrlə müraciət edilib. Lakin illərdir nəticə yoxdur. Əgər müraciətlər həqiqətən aidiyyəti şəxslərə çatdırılıbsa, o zaman ortaya daha ciddi sual çıxır: Nə üçün bu qədər uzun müddət ərzində bir yolun təmiri mümkün olmayıb?
Xüsusilə Gəncə Şəhər İcra Hakimiyyətinin başçısının təsərrüfat məsələləri üzrə müavini Kamran Məhərrəmovun və Gəncə Şəhər MKTİB-nin rəhbəri Nurməhəmməd müəllimin eyş-işrətdən başları açılmır, nəticədə onların diqqətinə çatdırılan bu problemin hələ də həll edilməməsi sakinlərin haqlı narazılığına səbəb olur.
Sakinlərin istədiyi nə xüsusi imtiyaz, nə də qeyri-adi bir tələbdir. Onlar sadəcə yaşadıqları şəhərdə normal və təhlükəsiz yoldan istifadə etmək istəyirlər.
Gəncə böyük və qədim şəhərdir. Şəhərin müxtəlif hissələrində abadlıq və quruculuq işləri aparıldığı halda, mərkəzə yaxın ərazidə bir yolun 10 ildən artıq müddətdə bu vəziyyətdə qalması ciddi şəkildə araşdırılmalıdır.
Aidiyyatı qurumların və xüsusilə şəhərin təsərrüfat sahəsinə cavabdeh şəxslərin bu məsələyə münasibət bildirməsi, yolun yerində araşdırılması və nəhayət, problemin köklü şəkildə həll edilməsi gözlənilir.
Sakinlər artıq vəd deyil, nəticə gözləyirlər. Bu yolun daha neçə il belə qalacağı isə açıq sual olaraq qalır..."
