"Cəmiyyətdə elə insanlar var ki, onların əsas prinsipi nə vicdandır, nə də dürüstlük. Onlar üçün əsas olan yalnız şəxsi maraq və vəzifədir..." "DİA-AZ" xəbər verir ki, bunu özünün sosial şəbəkə hesabında jurnalist Ariz Cəfərov qeyd edib.

O daha sonra fikrini belə davam etdirir: "Hakimiyyət dəyişən kimi mövqelərini də dəyişir, dünən təriflədiklərini bu gün tənqid edir, bu gün təriflədiklərini isə sabah rahatlıqla inkar edirlər. El arasında belə insanlara "buqələmun" demələri təsadüfi deyil.

Naxçıvanda baş verən rəhbərlik dəyişiklikləri zamanı da belə mənzərələr dəfələrlə müşahidə olundu. Yeni rəhbərlik gələn kimi bir vaxtlar əvvəlki rəhbərliyi tərifləyənlər qəfil fikir dəyişərək onu sərt şəkildə tənqid etməyə başladılar. Lakin çox keçmədən həmin şəxslərin özləri də vəzifələrini itirdilər. Maraqlısı isə bundan sonra baş verdi. Onları vəzifədən uzaqlaşdıran rəhbərlik də dəyişən kimi, eyni adamlar bu dəfə onun arxasınca danışmağa, onu günahlandırmağa başladılar.

Bu gün də eyni ssenari davam edir. Kim vəzifəyə gəlirsə, onun ətrafında görünməyə çalışırlar. Kim vəzifədən gedirsə, sosial şəbəkələrdə onun haqqında ittihamlar səsləndirir, özlərini isə guya savadlı, vicdanlı və peşəkar idarəçi kimi təqdim edirlər. Halbuki cəmiyyət onların dünən kimə xidmət etdiyini və bu gün niyə fərqli danışdıqlarını yaxşı xatırlayır.

Vəzifə sevgisi ilə prinsip arasında böyük fərq var. Prinsip sahibi insan şəraitdən asılı olmayaraq eyni mövqedə qalır. Buqələmun isə rəngini mühitə görə dəyişir. Belə davranış nə etibar qazandırır, nə də hörmət. Çünki insanlar səmimiyyəti də, saxtakarlığı da gec-tez görür.

Tarix göstərir ki, vəzifələr müvəqqətidir, xarakter isə insanın əsl simasıdır. Bu gün birinə yaltaqlanıb, sabah onun əleyhinə danışmaq nə cəmiyyətə fayda verir, nə də həmin insanın nüfuzunu artırır. Əksinə, belə davranış yalnız prinsipsizliyin və şəxsi maraqların göstəricisi kimi yadda qalır..."