Bakının Suraxanı rayonu, Yeni Günəşli qəsəbəsi ərazisində yerləşən "Sahil-S İnşaat" MTK sakinləri tərəfindən Məhkəmə-Hüquq Şurasına və onun tərkibi olan Ali Məhkəmə sədri İnam Kərimova müraciət ünvanlanıb. "DİA-AZ" Anaxeber.info.az-a istinadla həmin müraciəti olduğu kimi təqdim edir:
Hörmətli sədr və Məhkəmə-Hüquq Şurası, biz MTK sakinlərinin müraciətinə səbəb tikinti şirkətinin dələduzluğa yol vermiş rəhbərliyi haqda məhkəmə işinin uzanması və 4 ildir ki, təqsirləndirilən şəxslərə hökm oxunmamasıdır. Məlumat üçün bildiririk ki, MTK rəhbəri Taley Alaverdiyev və şəriki Pənah Kərimov bir mənzili bir neçə nəfərə satdığına görə həbs olunublar. Baş Prokurorluq yanında Korrupsiya ilə Mübarizə Baş İdarəsinin apardığı istintaq çərçivəsində hər iki şəxsin dələduzluğa yol verdiyi sübut olunub və zərər çəkən şəxslər tanınıb. Lakin Bakı Ağır Cinayətlər Məhkəməsində bu cinayət işi üzrə proses 4 ildir ki, yekunlaşmaq bilmir. Nəticədə biz sakinlərin mənzillərin sənədləri, Çıxarış və digər hüquqi məsələləri ilə bağlı problemi həllini tapmır. 
Hörmətli Məhkəmə-Hüquq Şurası və Ali Məhkəmə sədri İnam Kərimov.
Biz sakinlər - yəni 165 ailə hökm oxunmasını gözləyirik. Ancaq ölkədə ən ağır cinayət işlərinin məhkəmə istintaqı bir neçə ay içərisində yekunlaşdığı, təqsirləndirilən şəxs və ya şəxslərə hökm oxunduğu halda, bizim məhkəmə uzandıqca uzadılır. Hazırda iş hakim Elnur Nuriyevin icraatındadır. Bundan əvvəl iş hakim Əli Məmmədovda olub. Hakim Elnur Nuriyevə bu iş həvalə edildikdən sonra əvvəlcə dələduzluq əməlləri sübuta, yetirilmiş MTK rəhbərinin şəriki Pənah Kərimov ev dustaqlığına buraxılıb. Hakim Elnur Nuriyev qərarını belə əsaslandırmağa çalışıb ki, təqsirləndirilən Pənah Kərimovun təcili tibbi müdaxiləyə ehtiyacı var. Lakin azadlığa buraxıldıqdan sonra Pənah Kərimov əməliyyat olunmayıb. Əksinə, məlum olub ki, hakimin azadlığa buraxdığı bu şəxs daha sonra "Sea Breeze" ərazisində tikinti işinə girişib. Bu müddətdə Pənah Kərimov eyni cinayət əməllərini burada davam etdirib. O, "Sea Breeze"də sakinləri aldatdığı üçün yenidən barəsində cinayət işi açılıb.

Hörmətli Məhkəmə-Hüquq Şurası, bu məlumatı Baş Prokurorluq yanında Korrupsiya ilə Mübarizə Baş İdarəsindən də dəqiqləşdirmək imkanınız var. Yəni hakim Elnur Nuriyevin yanlışı, məhz səhv qərarı nəticəsində "tibbi müdaxilə" adı ilə azadlığa çıxan Pənah Kərimov bu dəfə başqa adamları aldadıb, nəticədə cinayət işi açılıb. Eyni zamanda, 4 ildir uzanan bu məhkəmə işi üzrə MTK rəhbəri Taley Alaverdiyevə də hökm oxunmur ki, biz sakinlərin hüquqi problemlərinin həlli üçün imkan açılsın. Hakim Elnur Nuriyev həm MTK sədrinin şəriki Pənah Kərimovu azadlığa buraxmaqla onun növbəti cinayətə yol verməsinə, dələduzluq etməsinə şərait yaradıb, həm də "Sahil-S İnşaat" şirkəti rəhbəri Taley Alaverdiyevə hökm oxumamaqla işi yubadır. Halbuki bir cinayət işinin məhkəmə istintaqı 4 il uzana bilməz. Ancaq hakim Elnur Nuriyev hər dəfə məhkəməni müxtəlif bəhanələrlə təxirə salır və dələduz Taley Alaverdiyev barəsində cəza kəsmir.
Biz sakinlərin xahişi odur ki, heç bir xəstəxana üzü görməyən, əməliyyat olunmayan, "Sea Breeze"də vətəndaşları aldatdığına görə barəsində cinayət işi açılmış Pənah Kərimovla bağlı azadlığa çıxmaq qərarı vermiş hakim Elnur Nuriyevin haqda ölçü götürülsün, həm də hazırda hökmünü gözlədiyimiz Taley Alaverdiyevin cəzası oxunsun, cəzaçəkmə müəssisəsinə göndərilsin. Eyni zamanda, iki dəfə eyni cinayəti törətmiş Pənah Kərimovun yenidən həbsə göndərilməsi təmin olunsun.
Hörmətli İnam Kərimov, biz illərdir ki, mənzillərin Çıxarışını məhz bu məhkəmə proseslərinin uzanması, hökmün verilməməsi səbəbindən ala bilmirik. Onsuz da bu illər ərzində nə əziyyətlər çəkdiyimizi bütün ictimaiyyət bilir. Bu illər ərzində zərər çəkənlər, ümumən 165 ailə dişi-dırnağı ilə binanın bir sıra həllinə çalışıb. Xüsusən də hörmətli I Vitse-Prezident Mehriban Əliyeva, Baş Prokurorluq yanında Korrupsiya ilə Mübarizə Baş İdarəsi və bir sıra qurumlar bizə dəstək olub, binada yaşayışımızın təminatı üçün köməklim göstərib. Lakin sonuncu instansiya - məhkəmə işində ilişmişik və hakim Elnur Nuriyev nə Taley Alaverdiyevə hökm oxuyur, nə də azadlığa buraxdığı Pənah Kərimov haqda tədbir görülür. Biz çox arzulayırıq ki, dövlət rəhbərliyinin və prokurorluğun verdiyi dəstək kimi, Məhkəmə-Hüquq Şurası da böyük bir köməklik göstərsin, məhkəmə işinin yekunlaşması üçün yardım etsin. Biz 165 ailənin sevincinə səbəb olacaq addım atmağınızı gözləyirik və xahiş edirik. Bizim dövlətimizdən başqa güvən yerimiz yoxdur.