Naxçıvanlı sürücülər iddia edirlər ki, Türkiyə tərəfində onları müxtəlif bəhanələrlə “ilişdirərək” yüksək məbləğdə rüşvət alırlar. Onların sözlərinə görə, bu işdə qonşu ölkənin jandarma və polisi əlbirdir.
Sürücülər bildirirlər ki, gömrüyü keçdikdən sonra “20 kilometr” adlanan ərazidə əvvəlcə jandarma onları saxlayır və çox vaxt əsassız olaraq taksi xidməti göstərməkdə günahlandırır. Daha sonra hadisə yerinə polis çağırılır.
Polis isə avtomobilin cərimə meydançasına aparılması barədə qərar çıxarır və maşın evakuatorla İğdır şəhərindəki cərimə duracağına aparılır. Sürücülərin sözlərinə görə, saxlanma müddəti bitdikdən sonra onlardan cərimə ilə yanaşı yüksək park və evakuator pulu da tələb olunur.
Onlar bəzi hallarda ödənişlərin yalnız nağd şəkildə qəbul edildiyini və qəbz verilmədiyini bildirirlər.
Şikayətçi sürücü Ramiq Cavadov deyir ki, bu yaxınlarda onun da başına eyni hadisə gəlib:
“Mən və digər naxçıvanlılar xəstəlik və ya işlərimizlə əlaqədar tez-tez Türkiyəyə gedirik. 20 kilometrlikdə jandarmalar bizi saxlayır, çox vaxt taksi işlədiyimizi deyib şərləyirlər. Təsəvvür edin ki, heç bir sübut olmadan sənə damğa vururlar.
Sonra polis çağırılır, maşını evakuatorla İğdırdakı cərimə meydançasına aparırlar. Maşına ən azı 15 günlük həbs qoyurlar ki, əlavə park pulu alsınlar, bəzən bu müddət 2-3 aya qədər uzanır. İttihamla razılaşıb cəriməni yerində ödəsən belə, maşını buraxmırlar.
Maşınımı çıxarmağa gələndə tələb olunan məbləği eşidəndə şoka düşdüm. Evakuator pulu, cərimə və park pulu ilə birlikdə 800 manat aldılar. Tələb etsəm də, ödənişlə bağlı qəbz vermədilər.”
Digər sürücü Nadir Əhmədov isə ayrı-seçkiliklə üzləşdiklərini bildirir:
“Dildə qardaş ölkə, iki dövlət bir millət deyirlər, amma əməldə ayrı-seçkilik edirlər. Günahın olub-olmamasından asılı olmayaraq, öz vətəndaşları ilə bizə fərqli münasibət göstərilir.
Öz vətəndaşlarından günlük 70 lirə park pulu aldıqları halda, bizdən 250 lirə tələb edirlər. Evakuator da onlara 20 manata başa gəlir, bizdən isə 150 manat alırlar.
Pulu hesaba köçürmək istəyəndə deyirlər ki, yalnız nağd ödəməlisiniz. Qəbz də vermirlər. Beləliklə bizi soyurlar. Əsassız cərimələr yazmaları isə hələ bir yana.”
Naxçıvanlı sürücülər aidiyyəti Türkiyə qurumlarına müraciət edərək, onlara qarşı ayrı-seçkiliyin aradan qaldırılmasını xahiş edirlər.
"Gündəlik Naxçıvan"
