"Uzun illərdir Baku Electronics mağazalar şəbəkəsinin müştərisiyəm və bu vaxta qədər bir çox elektronika məhsulu almışam. Amma son yaşadığım vəziyyət məni açıq şəkildə məyus edib". "DİA-AZ" xəbər verir ki, bu barədə "Müştəriyəm Şikayətim Var" sosial qrupundakı paylaşımında Farid Hasanzada adlı istifadəçi gileylənir.
Narazı vətəndaş daha sonra bildirir: "Son alış zamanı bir neçə məhsul aldıq. Çatdırılma zamanı daşımacılıq işçiləri tələsdiklərini deyərək qutuları açmamağı xahiş etdilər. Mən də etibar edib razılaşdım.
Evdə qutuları açanda isə məlum oldu ki, soyuducu ciddi şəkildə defektlidir və istifadəyə yararsızdır.
Bu məsələ ilə bağlı dəfələrlə telefonla zəng etmişəm. Sonda mağazaya yaxınlaşıb rəsmi ərizə yazdım.
Amma artıq 3-cü həftədir ki, mənə hər gün eyni tip boş və nəticəsiz SMS-lər gəlir:
“Sorğunuz həll yolu tapdı.”
Zəng edib soruşanda isə cavab belə olur:
“Biz də bilmirik, sizə xəbər edəcəyik.”
Açıq desəm, 3 həftədir hansı “həll yolu” tapılıb – başa düşmək olmur. Nə zəng edən var, nə konkret cavab, nə də real addım. Məhsul defektlidir, fakt ortadadır, amma məsələ süni şəkildə uzadılır.
Bu paylaşımı ona görə edirəm ki, insanlar xəbərdar olsun və eyni problemlə üzləşməsin.
Tövsiyəm: Məhsul evinizə çatdırılanda tələsməyin. Oturub bütün məhsulları bir-bir, diqqətlə yoxlayın. Sonradan problem çıxanda isə məsuliyyətin necə üzərindən atıldığını mənim kimi yaşamaq məcburiyyətində qalmayın..."
