Bakı şəhər sakini Əliquliyev Ramil Boris oğlu tərəfindən Hurriyyet.az saytının redaksiyasına şikayət məktubu daxil olub. Şikayətçi saytımız vasitəsilə Prezident İlham Əliyevə, Ali Məhkəmənin sədri İnam Kərimova və Baş orokuror Kamran Əliyevə müraciət edir:
“Cənab Prezident!
Hörmətli Cənablar!
Mən, Əliquliyev Ramil Boris oğlu, 26 noyabr 2024-cü il tarixində, saat 16:30 radələrində Zəngilan rayonu, Cahangirbəyli kəndi ərazisində iş vaxtı beton istehsalı üçün nəzərdə tutulmuş texnikadan istifadə edən zaman ağır xəsarət alaraq, sol qolumu dibindən itirmişəm. Belə ki, dərəcəsinə görə həyat üçün təhlükəli olan, sağlamlığa ağır zərər vurmaya aid edilən - sol III, IV və VI qabırğaların yerdəyişmiş sınıqları, sol tərəfli hemopnevmotoraks (sol döş boşluğuna qanın və havanın toplanması) və dərialtı emfizema ilə müşaiyət olunan döş qəfəsinin sol yarısının qapalı küt travması və sol çiyin səviyyəsində dəri deffekti ilə müşaiyət olunan sol bazunun yuxarı 1/3-dən travmatik amputasiyası xəsarətləri almışam.
Bədbəxt hadisədən dərhal sonra məni Dövlət Təhlükəsizlik Xidmətinin (DTX) Hospitalına yerləşdirdilər. Orada əməliyyat olundum və müalicəm bir neçə gün davam etdi.
29 dekabr 2024-cü il tarixində Zəngilan rayon prokuroru, ədliyyə müşaviri Kərimov Qibləli Ağa oğlu tərəfindən Zəngilan rayon Prokurorluğunda AR CM-nin 162-ci maddəsi ilə cinayət işi başlanılmış və istintaqın aparılması rayon prokurorunun böyük köməkçisi vəzifəsini icra edən II dərəcəli hüquqşünas Teyyub Rəfiyevə həvalə edimişdir. Müstəntiq Teyyub Rəfiyev işi araşdıran zaman yalnız işdə adı çəkilən Nizami adlı şəxsi məsuliyyətə cəlb etmişdir. Belə ki, təkcə sözügedən şəxsin əməllərinə hüquqi qiymət verilərək, təqsirləndirilən şəxs qismində cəlb edilmişdir. Halbuki, iş materiallarına nəzər salındıqda görünür ki, beton istehsalı üçün nəzərdə tutulmuş texnika istər işləyən, istər də dayanan zaman qoruyucu hissəsi olmamışdır.
Cinayət işi aidiyyəti üzrə Zəngilan rayon Məhkəməsində Gülsarə İmanovanın icraatına daxil olmuşdur. İşi üzrə ittiham tərəfi Nəbiyev Tural Hüseyn oğlu təyin edilmişdir. İttiham tərəfi məhkəmə istintaqında bir dəfə də olsun mənim verdiyim ərizələri və müraciətləri qəbul etmədi. Formal olaraq şirkətin xeyrinə fikirlər səsləndirərək, müraciətlərimin təmin olunmamasını xahiş etdi.
Məhkəmə də öz növbəsində nə mülki iddiamı, nə də günahı olan Fərhad Təhməzovun qohumları Xurşud və Yunis (hər ikisi “Hünər İnşaat” Firmasının vəzifəli şəxsləridir) və onun ətrafında olan vəzifəli şəxslərlə bağlı heç bir tədbir görmədi. Formal olaraq hadisə zamanı işdə olmayan Nizami adlı şəxsə 3.00 0(üç min) manat cərimə cəzası kəsməklə canlarını qurtardılar.
Qeyd edim ki, istehsalatda baş vermiş bədbəxt hadisə haqqında №01/2025 saylı aktdan da görünür ki, əmək qanunvericiliyinin pozuntusuna yol vermiş şəxslərdən biri direktor Nəbiyev Yunisdir. Bundan başqa, həmin aktın 9, 9.1, 9.2, 9.3-cü bəndlərində “yoxdur” sözü qeyd edilmişdir ki, bu da axırıncı dəfə əməyin təhlükəsizliyinə dair keçirilən təlimatın tarixi, giriş təlimatı, ilkin(təkrar) təlimat, biliyin yoxlanılması qeyd edilməmişdir. Bu azmış kimi, şirkətin əməkdaşı Ruhin Nəcəfi adlı şəxs təhlükəsizlik jurnalına köhnə tarixlərə qol çəkməyimi tələb etdi, lakin mən imza etmədim.
Həmin cihazın yalnız istifadə qaydası araşdırılmış, istifadəyə qədər olan müddətdə, həmin cihazın yararlı, yaxud yararsız olması müəyyən olunmayın. O da aydın olmayıb ki, həmin cihazdan fəhlə və operator istifadə edə bilərmi? Buna icazəni kim vermişdir? Həmin aparat Zəngilan rayonu, Cahangirbəyli kəndi ərazisinə kimin razılığı ilə yerləşdirilmişdir? Bu və digər suallar “Hünər İnşaat” Firmasının vəzifəli şəxslərinə verilməmişdir.
Qeyd edim ki, “Hünər İnşaat” şirkətinin direktoru Yunis Nəbiyev, operator vəzifəsində çalışan Vüsal Bədəlov və sözügedən şirkətin digər vəzifəli şəxslərinin icazəsi olmasa Zəngilan rayonu, Cahangirbəyli kəndi ərazisinə beton istehsalı üçün nəzərdə tutulmuş texnika yerləşdirilə bilməzdi. Əgər həmin texnikanın işləməsinə icazə verilirsə, bu “Hünər İnşaat”ın vəzifəli şəxsləri tərəfindən verilmişdir. Mənə təqdim olunan alqı-satqı müqaviləsinə əsasən, həmin texnikaya cavabdehliyi alqı-satqı müqaviləsi üzrə pul ödənildikdən sonra “Hünət İnşaat” Firmasının öhdəsinə düşür. Burada Nizami adlı şəxsin əməllərinə qədər olan hissə araşdırılmaq əvəzinə, yalnız Nizami adlı şəxs məsuliyyətə cəlb edilmişdir. Mən bununla qəti razı deyiləm.
Mənim başıma gələnlər göz qabağındadır. “Hünər İnşaat”ın vəzifəli şəxsləri həm vəzifə səhlənkarlığına yol vermiş, həm vəzifə səlahiyyətlərini aşaraq bu əməli törətmişlər və hal-hazırda da həmin texnika bugünkü gündə sözügedən ərazidə işləməkdə davam edir. Mənimlə heç kim maraqlanmır, mənə heç bir maddi və mənəvi dəstək göstərilmir. Bu azmış kimi, cinayət işi də düzgün araşdırılmamışdır. Mən özümü öldürmək həddinə çatmışam.
“Cənab Prezident!
Hörmətli Cənablar!
Qeyd edilənləri nəzərə alaraq, Sizdən xahiş edirəm ki, Zəngilan Prokurorluğunun böyük köməkçisi Teyyub Rəfiyev, Zəngilan rayon Məhkəməsində cinayət işi üzrə ittiham tərəfindən çıxış edən prokuror Nəbiyev Tural Hüseyn oğlu, Zəngilan rayon Məhkəməsinin hakimi Gülsarə İmanovanın, eləcə də Fərhad Təhməzovun qohumları Xurşud və Yunis (hər ikisi “Hünər İnşaat” Firmasının vəzifəli şəxsləridir), şirkətin operator vəzifəsində çalışan əməkdaşı Vüsal Bədəlov, mənə köhnə tarixlə təhlüksəziliklə bağlı təlimat jurnalına qol çəkdirmək istəyən əməkdaş Ruhin Nəcəfi və şirkətin digər vəzifəli şəxslərinin əməllərinə hüquqi qiymət verilməsinə göstəriş verəsiniz.
Onu da qeyd edim ki, bütün dediklərimə dair şahidlərim var. Həmin qəza vaxtı məzuniyyətdə olan şəxsə 3000 min manat cərimə yazılıb. Bu qədər haqsızlıq olmaz”.
