Dünən Naxçıvan şəhər Məhkəməsində etirazçı müəllim Səriyyə Qənbərovaya qarşı şikayət üzrə növbəti proses keçirilib. Prosesin əvvəlində Səriyyə Qəmbərova hakim Gülnar Səfərəliyevanın ədalətsiz və sifarişli qərar çıxardığını əsas gətirərək, məhkəm heyətinə etiraz edib. Onun vəsatəti qəbul olunub və bu səbəbdən məhkəmə təxirə salınıb. Bu haqda “Gündəlik Naxçıvan“a Səriyyə Qəmbərova məlumat verib.
Onun sözlərinə görə, növbəti prosesdə hakim heyəti ilə bağlı qərarı bu qurum verəcək:
“Bu hakim eyni kökənli 4 müxtəlif işlə bağlı mənim əleyhimə qanunsuz qərarlar verib. Bu qərarlar verilərkən o, saxta sübutlara əsaslanıb, mənim təqdim etdiyim heç bir faktı qəbul etməyib. O, birbaşa yerli Təhsil Nazirliyinin sifarişlərini həyata keçirir. Bu nazirlik isə, korrupsiya və qanunsuzluqları ifşa etdiyim üçün məndən qisas almaq istəyir. Bu səbəbdən Gülnar Səfərəliyevanın mənim işimə baxmasına etiraz etdim. Ümid edirəm ki, vəsatətim təmin olunacaq.”
Dünən baş tutan məhkəmədə şikayətçi tərəf adı korrupsiya və rüşvətxorluqda hallanan məktəb dikertoru Asudə Məmmədovadır. Direktor iddia edir ki, müəllim onu döyüb. Lakin, bir müddət əvvəl sosial şəbəklərdə yayılan videoda müəllimin özünün direktor və ətrafı tərəfindən hücuma məruz qaldığı görüntülənir. O, bu zorakılıqla bağlı məhkəməyə müraciət etsə də, şikayəti araşdırılmayıb.
Səriyyə Qəmbərova hakimin onu barışığa məcbur etdiyini bildirir:
„İki prosesdir ki, hakim məni barışıq ərizəsi yazmağa məcbur edir. İmtina etsəm də israr edir. Deyir ki, ərizəni yaz, işi bağlayaq. Mən isə, bəraət istəyirəm. Əslində döyülən mənəm, şikayəti bunlar edir. Kifayət qədər sübutlar vermişəm. Zəhmət çəksin, araşdırsın. Ancaq, bu hakim yalnız direktor vən onun saxta şahidklərinin ifadələrinə əsaslanır, fakta gələndə, yayınır məsələdən. Ondan imtina etməyimin bir səbəbi də məni barışığa məcbur etməsidir“
Səriyyə Qənbərova ötən ilin oktyabrına qədər Naxçıvan şəhər 1 saylı tam orta məktəbində fiziki tərbiyə müəllimi işləyib. Buradakı korrupsiya və digər qanun pozuntularını ictimailəşdirdikdən sonra öncə məktəbdə döyülüb, daha sonra isə işdən qovulub. İki övlad anası olan müəllim hazırda işsizdir. O, işdən qanunsuz çıxarılması ilə bağlı məhkəməyə şikayət etsə də, heç bir nəticə əldə edə bilməyib.
