Bir neçə gündür şəhərin müxtəlif yerlərində növbəti dəfə susuzluq yaranıb. Əhaliyə xəbərdarlıq edilmədən su kəsilib. Binəqədi rayonunda insanlar daha böyük çətinliklə üzləşiblər. Sosial mediada yazılanlar da belə deməyə əsas verir. Həmişə olduğu kimi, Dövlət Su Ehtiyatları Agentliyi şikayətləri qulaqardına vurur.
Bizimyol.info xəbər verir ki, agentliyinin Heydər Əliyev prospektindəki yeni binasının tezliklə təhvil veriləcəyi gözlənilir. Son hesablamalar indiyə qədər azı 120 milyon manatın xərcləndiyini göstərirdi. İndi vəziyyətin nə yerdə olması barədə məlumat verilmir. Təkcə o məlumdur ki, Dövlət Su Ehtiyatları Agentliyi bir müddət sonra əhaliyə bir damla su şəklində tikilmiş yeni binadan xidmət göstərməyə başladığını açıqlayacaq.
Agentlikdən şikayətlər bayram günlərində lap çox artmışdı. Xüsusilə Abşeron yarımadasında insanlar susuzluqdan necə əziyyət çəkdiklərini yazırdılar. Dövlət Su Ehtiyatları Agentliyinə Sumqayıtdan, Xırdalandan, Biləcəridən, Lökbatandan şikayətlər ünvanlanıb. Abonentlər bildirir ki, məhz bayram günü susuz qalıblar. Agentlik insanların imdadına qəti əhəmiyyət verməyib.
Dövlət Su Ehtiyatları Agentliyi sosial platforma hesablarında 22 mart Ümumdünya Su günü ilə bağlı paylaşımlar etmişdi. Rəy bölümündə insanlar necə susuz qaldıqlarını yazmışdılar. Təsəvvür edin, Ümumdünya Su günüdür, dövlət qurumu bunu xüsusi fərqləndirir, amma camaata su vermir.
Verilən suyun keyfiyyətsizliyi isə ayrıca mövzudur. Əhalinin əksər hissəsinə çirkli su verilir. Sosial mediada bununla bağlı saysız-hesabsız paylaşımlar var. İnsanlar suyu pambıqla süzməli olur. 21-ci əsrdə su təsərrüfatında gəldiyimiz nöqtə budur. Bu halın yaşanmasına görə xəcalət çəkmək lazımdır. Dövlət Su Ehtiyatları Agentliyi isə ictimaiyyətlə hesablaşmır. Milyonlarla pul havaya sovrulur. Dotasiyalar effektsiz xərclənir, yeni bina kimi bahalı layihə ilə büdcəyə zərbə vurulur. Keyfiyyətsiz iş görmək az deyilmiş kimi, üstəlik, suyun qiymətinin artması müzakirə olunur.
Bir damla su şəklində tikilən bina əhaliyə acıq verməkdən başqa bir şey deyil. İnsanlar bəzən məhz o bir damla suyun yolunu günlərlə gözləyir.
