Məcburi köçkünlərlə bağlı videolar yenə onları gündəmə gətirib. Bilmirsən qınayasan, yoxsa anlamağa çalışan.
Bəli, məcburi köçkünlər öz yurdlarına geri qayıtmalıdırlar. Xüsusilə başqalarının evini zəbt edənlər. Bu ölkədə məcburi köçkünlərə çox böyük imtiyazlar verilib. İndi də verilir. Ötən il Laçında olarkən oradakı evləri gördüm. Çox gözəl idi, içində də bütün şəraiti. Amma o evlərin 90 faizində yaşayanlar ancaq yaşlı insanlar idi. Cavanlar çıxıb getmişdi. Çünki əksəriyyəti ora qayıtmaq istəmir. Əsas səbəb kimi də işsizliyi göstərirlər. Nəzərə almalıdırlar ki, bu problem bütün bölgələrdə var. Üstəlik, o insanların məcburi köçkünlər kimi imtiyazları da yoxdur. Ev bəyənməmək, “mən filan kənddə yox, filan yerdə ev istəyirəm” nə deməkdir? Digər tərəfdən onu da düşünürsən ki, 30 ildən çox yaşadığı yeri, sıfırdan qurduğu həyatı qoyub getmək onlar üçün asan deyil. Amma torpaqları geri almışıqsa, onlar da geri qayıtmalıdırlar. Bu evlər onların deyil. Ya dövlətindir, ya da başqa birinin. Evi zəbt olunan insanların çoxu hələ də kirayədə yaşayır, bir qismi isə evində yaşamağa fürsət tapmamış bu dünyadan köçüb. Onlar da bu ölkənin vətəndaşlarıdır və öz evlərini istəyirlər. Haradan baxsan, hər iki tərəf zərərçəkəndir. Arzulayaq ki, belə hallar tezliklə bitəcək. Bu görüntülərə təkcə biz yox, düşmənlərimiz də baxır. Müharibədə qalib gəlmiş bir ölkəyə yaraşmır bu. Videoda qışqıran qadının yerinə isə mən utandım.

Müəllif: Nigar Sabirqızı - Mənbə: "DİA-AZ"