"Kamal Abdulla nə deyib bilmirəm. Açığı öyrənməyə də cəhd etmirəm. Gündəmi izləmirəm. Ümumiyyətlə son iki ildir özümü həyati əhəmiyyəti olmayan informasiyalardan, dedi -qodu motivli müsahibələrdən məhrum etmişəm..." "DİA-AZ" xəbər verir ki, bunu özünün sosial şəbəkə hesabında tanınmış teleaparıcı Günel Musa yazıb.

O daha sonra fikrini belə davam etdirir: "Amma Mirşahin bəyin "əsəbi dil"də yazdığı status çıxdı qarşıma. Mirşahin Ağayevin fikirlərində haqlı tərəf də var, problemli tərəf də.
Haqlı olduğu məqam odur ki, sosial şəbəkələrdə insanlar çox tez təhqirə, linçə, şəxsi alçaltmaya keçir. İctimai fiqurun fikrini bəyənməmək normaldır, amma söyüş və kütləvi hücum artıq sağlam müzakirə deyil. Bu hissədə dedikləri başadüşüləndir.
Amma karifey jurnalist özü də eyni emosional və yuxarıdan baxan dildən istifadə edir. İnsanları “həpənd”, “güruh tikəsi”, “plintusaşırı” adlandırmaq, kasıb ailələrin sosial narahatlığını aşağılamaq cəmiyyətdə dialoq yaratmır, əksinə qarşıdurmanı böyüdür.
Hə bir də “Uşaq sevgidən doğulmalıdır” fikri mənəvi baxımdan gözəl səslənir, amma Mirşahin müəllim həyat o qədər də poetik deyil e. Uşağın böyüməsi üçün iqtisadi təhlükəsizlik də lazımdır. Dünyanın inkişaf etmiş ölkələrinin çoxunda uşaq pulu verilməsi məhz dövlət siyasətidir. Yəni sosial dəstək istəmək avtomatik “pul üçün uşaq doğmaq” anlamına gəlmir. Heç kim sırf “uşaq pulu var” deyə gecələr yuxusuz qalacağı, illərlə məsuliyyət daşıyacağı bir həyata həvəslə atılmır. Amma sizi də qınamıram. Yəqin yuxarı mərtəbədən aşağıdakı insanların dərdi xırda görünür..."