BMT-nin Beynəlxalq Cinayət Məhkəməsinin sabiq prokuroru Luis Okamponun mətbuata sızan video və səs yazıları, Avropa İttifaqının Ermənistan ilə münasibətlərinin hansı istiqamətə yönələcəyi barədə suallar doğururdu.
Ortaya çıxan qərəzli faktlara baxmayaraq, Ermənistanın xarici siyasət kursu Qərbə meyillənib. Paşinyanın avropapərəst mövqeyi Rusiya rəsmilərinin etiraz ruhunu alovlandırmağa davam edir. Ermənistandakı səfir Sergey Kopırkin, mayın 4-də İrəvanda keçirilən Avropa Siyasi Birliyinin sammiti ilə bağlı sərt açıqlama verib. Diplomat, tədbirdə Rusiyanın təhdid xarakterli ölkə kimi müzakirə olunmasından gileylənib. Hazırda beynəlxalq diqqət, Avropa İttifaqı ilə Rusiya arasında strateji mövqeyi sınaqda olan Ermənistana yönəlib.
Mövzu ilə bağlı tanınmış jurnalist, siyasi şərhçi Elçin Alıoğlu Sherg.az-a bildirib ki, Avropa İttifaqı Ermənistanı yaxın 10 il ərzində öz sıralarına qatmayacaq:
“Aİ İran İslam Respublikası ilə həmsərhəd olmaq istəməz. Sadəcə, Ermənistanla əlaqələrin gücləndirilməsi və onun Rusiyanın təsir dairəsindən uzaqlaşdırılması üçün bütün mümkün vasitələrdən istifadə ediləcək. Görünən odur ki, Avropa İttifaqının şahmat taxtasında piyada fiqur olan Ermənistandan sadəcə istifadə edirlər. Rusiyadan iqtisadi asılılıq Ermənistanı siyasi baxımdan da Moskvanın təsiri altına salıb. Aİ ilə İrəvan arasında iqtisadi müasibətlərin genişlənməsi isə mümkün olan iş deyil”.
Jurnalistin sözlərinə görə, Ermənistan iqtisadi və sənaye baxımından güclü olan Avropa bazarında rəqabət apara bilməz:
“Ermənistanın iqtisadiyyatını təşkilata daxil olan ölkələrin səviyyəsinə qaldırmaq üçün azı 15 il ərzində planlı və fasiləsiz işlər görmək lazımdır. Ermənistanın Aİ-yə sata biləcəyi məhsul kateqoriyası yalnız kənd təsərrüfatı məhsulları və xammal üzərində qurula bilər. Buna görə də qurumun rəsmi dairələrinin Ermənistanı xoş niyyətlə qarşılayacağına inanmağım gəlmir. Sadəcə məqsəd nəyin bahasına olursa-olsun Ermənistanı Rusiyanın prioritet asılılığından çıxarıb, Aİ-dən asılı hala salmaqdan ibarətdir”.
E.Alıoğlu, Aİ ilə Ermənistanın hazırki vəziyyətini vaxtilə Gürcüstanda baş verən proseslərlə müqayisə edib:
“Buna Tiflis senarisi deyirlər. Gürcüstan illərlə Aİ-dən asılı vəziyyətdə qaldı. Bütün xarici siyasətini Brüssel və Strasburqdan aldığı təlimatlar əsasında yürütdü. Nəticəsi isə hazırda göz qabağındadır. Nə Abxaziya nə də Cənubi Osetiya separatçılıq rejimindən azad edilib. Bir sözlə, Avropa İttifaqı yalnız vədlər verir. Aİ uzaqda, Rusiya isə Ermənistana bir əl qədər yaxındadır. Bunu Paşinyan höküməti nəzərə almalıdır”.
