“Ramiz Mehdiyev işi” ilə əlaqədar həbs olunan Əli Kərimlinin saxlanması nə dünya mediasında, nə də siyasi aləmdə heç bir rezonans doğurmadı.

Avropa və ABŞ tərəfindən bu məsələyə heç bir diqqət ayrılmadı. Bu isə bir daha təsdiqləyir ki, Əli Kərimli Qərb siyasi mühiti üçün heç bir əhəmiyyət daşımayıb və onun fəaliyyətinə heç bir zaman diqqət yetirilməyib.

Lakin bu da faktdır ki, Əli Kərimli hər zaman Azərbaycan əleyhinə olan şəxslərlə əlaqədə olub. Onun müdafiəçilərinin kimliyini araşdıranda bu fakt özünü göstərir. Prosesin rəhbəri olan Ramiz Mehdiyevin Rusiya ilə bağlılığı kimi, onun həmfikirlərini də ancaq Azərbaycan əleyhinə olan adamlar müdafiə edir.

Gültəkin Hacıbəylinin Türkiyədə saxlanması və PKK uzantısına aid bir siyasi qurumun təmsilçisindən dəstək alması buna əyani sübutdur.

İndi də Əli Kərimlini Azərbaycanın ən qatı əleyhdarı olan konqresmen Kris Smitin müdafiə edəcəyi ilə bağlı məlumatlar yayılır. Milli Şuranın sədri, Ramiz Mehdiyev “çete”sinin üzvü olan Cəmil Həsənli iddia edir ki, Ukraynanın ingilis dilində çıxan “Kiyev Post” (“Kyiv Post”) həftəlik nəşrinin məlumatına görə, Əli Kərimlinin həbsinə Ağ Ev Administrasiyasından münasibət bildirilməməsi ermənipərəsət konqresmeni hiddətləndirib.

Ona görə də Tom Lantos İnsan Hüquqları Komissiyasının həmsədri, Nyu-Cersidən respublikaçı konqresmen Kris Smit yaxınlarda “2025-ci il Azərbaycan Demokratiyası Aktı” adlı qanun layihəsini təqdim etmək niyyətində olduğunu açıqlayıb. Bu qanun layihəsi Azərbaycanı hədəfə almağa hesablanıb.

Əli Kərimlinin ideya ortağı olan ermənipərəst konqresmen Kris Smitin Azərbaycan əleyhinə fəaliyyəti və onun erməni diasporunun əlində alət olması artıq Azərbaycan cəmiyyətinə məlumdur.

O, dəfələrlə erməni lobbisinin təsiri altında Azərbaycan əleyhinə müxtəlif sənədlər hazırlayıb və onun qəbul olunmasına çalışıb. Lakin bacarmayıb.

Onun fəaliyyətində xüsusi seçilən aspektlərdən biri də odur ki, bu layihələrdə təkcə Azərbaycan hökuməti deyil, həm də bütünlükdə xalqın əleyhinə müddəalar nəzərdə tutulub.

Xatırladaq ki, Kris Smit konqresə ABŞ-də erməni lobbisinin güclü olduğu Nyu-Cersi ştatından seçilib və həmin şatat ermənilərin məskunlaşdığı ərazilərə görə Amerikada sayca 4-cü yeri tutur.

O, Türkiyənin də əleyhinə fəaliyyət göstərən aktiv konqresmen olub. Konqresdə “soyqırım” məsələsini qaldıran və onun qəbulun nail olmaq üçün lobbiçilik fəaliyyəti göstərib.

Süleyman
“Cebheinfo.az”