Erməni müxalifəti gələn ilin yayına təyin olunmuş parlament seçkiləri ərəfəsində səylərini birləşdirməyə çalışır. Noyabrın 20-də Ermənistan Baş Prokurorluğunun binası qarşısında hökumət əleyhinə olan qüvvələrin iştirakı ilə etiraz aksiyası keçirilib.

“Yaxın vaxtlarda rəsmi bəyanatla çıxış edəcəyik və siyasi qüvvələrlə məsləhətləşmələrə başlayacağıq”, – “Daşnaksütyun” partiyasının Ali Orqanının nümayəndəsi, “Ermənistan” blokundan deputat İşxan Saqatelyan orada bəyanat verib.

O, müxalifətin hazırkı hakimiyyətə qarşı atdığı addımların yetərli olmadığını etiraf edib. Saqatelyan qeyd edib ki, vəziyyəti dəyişmək üçün ən azı siyasi məhbusların müdafiəsi, repressiyalara qarşı mübarizə mexanizmlərinin yaradılması, kilsənin müdafiəsi kimi məsələlərdə bütün müxalifət tam həcmdə əməkdaşlıq etməlidir: “Artıq danışdığımız qüvvələr bizim təklifimizə müsbət reaksiya veriblər. Müxalifət meydanı bir-birini hədəfə çevirməməlidir. Əsas hədəf anti-erməni hakimiyyət olmalıdır”, – deputat vurğulayıb.

Onun fikrincə, Ermənistanda hakimiyyətin biabırçılıqlarına” və repressiyalarına qarşı təkbaşına dura biləcək heç bir siyasi qüvvə yoxdur.

Saqatelyan əlavə edib ki, “ruhunu və vicdanını Nikol Paşinyana satmış” prokurorlar, istintaqçılar və hakimlərə ümid o qədər də böyük deyil: “Onlar sübut etdilər ki, hazırkı məhkəmə-hüquq sistemi repressiyalar və saxta ittihamlarla insanların həbsə atılması yolu ilə ölkədə bir nəfərin hakimiyyətini təmin etmək üçün Paşinyanın əlində küt alətə çevrilib. Amma bütün bunlar o demək deyil ki, biz səsimizi qaldırmamalıyıq. Əgər Nikol növbəti həbsi və repressiyanı rahatlıqla “həzm edə” bilsə, dayanmayacaq və eyni cür davam edəcək”, – deputat izah edib.

Onun məlumatına görə, Ermənistanda 50-dən artıq siyasi məhbus var: “Milli xeyriyyəçi, ruhanilər, Ermənistan və Qarabağ parlamentlərinin deputatları, hərbçilər, sıravi vətəndaşlar yalnız ona görə həbsdədirlər ki, öz fikirləri var, erməni identikliyini qorumağa çalışırlar və hakimiyyətin anti-erməni addımları ilə barışmırlar”, – İşxan Saqatelyan vurğulayıb. Nümunə kimi o, Gümrüdə “öz səsini və demokratiyanı müdafiə etməyə qalxan” insanların saxlanılmasını xatırladıb.

Ardınca söz “Ermənistan” bloku parlament fraksiyasının katibi Artsvik Minasyana verilib. O bəyan edib ki, onlar hazırkı Ermənistan hakimiyyətini kənarlaşdıracaqlar və “ölkənin çiçəklənmə dövrü gələcək”.

Minasyan Baş Prokurorluğu Konstitusiyanı pozmaqda ittiham edib və hüquq-mühafizə orqanlarını qanunlara riayət etməyə, Əsas Qanuna əsaslanmağa, hakimiyyətin göstərişlərini yerinə yetirməməyə və bütün siyasi məhbusları azad etməyə çağırıb: “Erməni dövləti bunu qiymətləndirəcək, Paşinyanın satqın hakimiyyəti isə tez ya gec gedəcək”, – Minasyan əminliklə bildirib.

Etirazçılar Baş Prokurorluğa bütün siyasi məhbusların azad olunmasını tələb edən məktub təqdim ediblər.

“Əminəm ki, Nikol Paşinyan maksimum 2026-cı ilə qədər gedəcək”, – “Ermənistan” blokundan deputat Qarnik Danielyan aksiyada çıxışı zamanı bunu deyib. O əlavə edib ki, onun “cinayətlərində” əli olan bütün şəxslər məsuliyyətə cəlb olunacaqlar.

Danielyan hakimiyyətə xalq təzyiqinin zəruri olduğunu bildirib: “O, xalqın taleyini onun yox, məhz xalqın özü həll etdiyini, kimin həbsdə olacağına, kimin olmayacağına da özünün qərar vermədiyini anlamalıdır”.

Onun sözlərinə görə, “iqtidarda olan “Vətəndaş müqaviləsi” partiyasının üzvləri və tərəfdarları insanları güllələmək, başlarını və boğazlarını kəsmək lazım olduğunu deyir, qarabağlı ermənilərə qarşı zorakılığa çağırırlar, cəmiyyətdə parçalanma yaradırlar”.

“Hakimiyyətdəkilər elə düşünürlər ki, istədikləri adamı təhqir edə bilərlər, ancaq onlara cavab verənlərin arxasınca maskalı DTK əməkdaşları gəlir”, – deputat qeyd edib.

Onun qiymətləndirməsinə görə, Ermənistanda təqribən 40 siyasi məhbus var və bu rəqəm durmadan artır.

Deputatların fikrincə, bütün bunlar söz azadlığını məhdudlaşdırmağa, həmçinin bu tələblə çıxış edən insanları siyasətə buraxmamağa yönəlib. Misal kimi o, Samvel Karapetyanın həbsini göstərib.

Maraqlıdır, prokurorluq qarşısında bu aksiyanın keçirilməsi nəyi göstərir? Ermənilərin nə qədər hissəsi bu üç deputatın səsləndirdiyi fikirləri bölüşür? Gələn ilin yayına qədər bu əhval-ruhiyyənin populyarlaşması və seçicilər arasında ciddi şəkildə yayılması riski varmı?

Milli Məclisin deputatı, politoloq Rasim Musabəyov bu barədə fikirlərini Pressklub.az-la bölüşüb.

Onun sözlərinə görə, Robert Koçaryanın və daşnakların ümid etdiyi senari – yəni, rüsvayçı şəkildə uduzulmuş İkinci Qarabağ müharibəsindən sonra seçkilərdə Nikol Paşinyanı hakimiyyətdən uzaqlaşdırılması və Robert Koçaryanın qalib gəlməsi – iflasa uğrayıb: “İndi isə onlar strategiyalarını Nikol Paşinyana qarşı bütün müxalifəti konsolidasiya etmək üzərində qururlar. İndi Koçaryan da, Serj Sarqsyan da artıq əsas məqsədlərini hakimiyyətə özlərinin qayıtması yox, istənilən yolla Nikol Paşinyanı hakimiyyətdən uzaqlaşdırmaq kimi qoyurlar, sonrası isə necə deyərlər, vəziyyətə uyğun olacaq.

Düşünürəm ki, onlar üçün nümunə Gümrü seçkiləridir. Orada həm avropayönlü, həm kommunist müxalifətini, həm “oğruları”, həm də korrupsiyaçıları müəyyən uğur gözləyirdi. Onlar hamısı birlikdə buna nail oldular ki, Nikol Paşinyanın partiyası Gümrü Ağsaqqallar Şurasında nisbətən çoxluq qazansa da, şəhərin meri korrupsiyaçı və oğru kommunist oldu. Amma Nikol Paşinyan indi həm onu, həm də oğlunu, necə deyərlər, günahlarına görə həbsə atıb”, – ekspert bildirib.

Onun sözlərinə görə, ümumilikdə bütün bunlar Paşinyan nə keşişlər, nə də “Moskvadan göndərilmiş xalq xeyriyyəçisi, milyarder Karapetyana” qarşı mərhəmətli davranmaq niyyətində olmadığını göstərir: “Terrora çağıran ruhanilərə münasibətdə də, Moskvadan “ezam olunmuş” xalq xeyriyyəçisi, milyarder Karapetyana münasibətdə də güzəştə getmir – Karapetyan indi istintaq təcridxanasında yatır. Deməli, mübarizə ölüm-dirim mübarizəsidir. Nikol Paşinyan çox yaxşı anlayır ki, seçkini uduzub hakimiyyətdən uzaqlaşdırılsa, təkcə hakimiyyətdən deyil, azadlığından, hətta həyatından da məhrum ola bilər. Məncə, bunu onun çoxlu tərəfdarları da dərk edir. Onlar da bu “dünənkilərə” qarşı çox ciddi şəkildə mübarizə aparırlar.

Nikol Paşinyanın növbəti dəfə çoxluğu qazanmaq şansı qalır. Onun qarşısında duran vəzifə isə budur: əgər parlamentə başqa qüvvələr düşəcəksə, onlar elə qüvvələr olmalıdırlar ki, koalisiya qurmaq mümkün olsun.

Hazırda, bir şeyi demək olar ki, Ermənistanı kifayət qədər gərgin siyasi həyat gözləyir. Nəticələri əvvəlcədən proqnozlaşdırmaq çətindir, amma bu gün Ermənistanda kifayət qədər yüksək iqtisadi artım müşahidə olunur. Bu artımın mənbələri ayrıca söhbət mövzusudur. Ümumilikdə isə əhali Azərbaycanla müharibə etmək istəmir. Əgər Nikol Paşinyan bu kartları düzgün oynasa, onlar ona növbəti qələbəni gətirə bilər. Gözləyək ", – Musabəyov yekunlaşdırıb.