İrəvanda “Avrasiya inteqrasiyası və Ermənistan Respublikasının iqtisadi inkişaf perspektivləri” mövzusunda beynəlxalq dəyirmi masa keçirilib. KİV-in məlumatlarına görə, tədbirdə “Vahid Sağlamlıq” koalisiyasının lideri, ictimai xadim Qriqor Qriqoryan olduqca qəribə bəyanatlarla çıxış edib.

“Ölkədə hakimiyyəti ələ keçirmiş xunta on minlərlə nəfərlik şəxsi qvardiya yaradıb. Sosial məsuliyyəti aşağı olan bu qvardiya üzvləri öz xalqını sındırmağa, döyməyə, güllələməyə hazır olan adamlar. Bunlar əsasən əyalətlərdən olan, savadsız gənclərdir. Onlar üçün 100 min dram (260 dollar) qazanc böyük uğur sayılır. Burada isə onlara 500 min dram ödəyirlər. Bu insanlar elə silahlarla təmin olunublar ki, o silahdan hətta ordumuzda belə yoxdur”, – Qriqoryan iddia edib.

O əlavə edib ki, Azərbaycanla sərhəddə döyüş mövqelərində olan erməni könüllüləri silah və sursat çatışmazlığından ciddi əziyyət çəkirlər. Qriqoryanın sözlərinə görə, qvardiya isə heç nədən korluq çəkmir və Qərb istehsalı olan ən müasir silahlarla təchiz edilir.

O, daha sonra bəyan edib ki, Ermənistan artıq Rusiyadan qoparılıb və NATO ərazisinə çevrilib.

“Bu gün Ermənistan klinik ölüm vəziyyətindədir. Bu gün inteqrasiyadan, reinteqrasiyadan və sairədən danışmaq artıq işləmir. Bizi Rusiyadan qoparıblar. Bu, NATO ərazisidir. Rusiyanın 102-ci bazasının mövcudluğu isə zaman məsələsidir. İnsanlarbu bazanın ölkədən çıxmasını tələb etmək üçün sadəcə uyğun an gözləyirlər”, – deyə Qriqoryan bildirib.

Onun sözlərinə görə, bu vəziyyət on illər boyunca hazırlanıb.

“1994-cü ildə MDB ölkələrində əhalinin sağlamlığı barədə məlumat toplayan Epi Info proqramı tətbiq ediləndən sonra müstəmləkəçilik başladı. Bəli, bu gün dronlar dövrüdür. Bəli, texnologiya irəliləyib. Amma hələlik dronları insanlar idarə edir. Sağlamlıq – həm ordu, həm də hökumət üçün kritik sahədir. Düşmən ilk növbədə nə etdi? Səhiyyə sistemini öz nəzarəti altına aldı. Rusiya Federasiyası və Belarus istisna olmaqla Sovet İttifaqının bütün keçmiş respublikalarında. Belarus siyasi yetkinliyi sayəsində sistemin dərin müdaxiləsinə imkan vermədi. Rusiya isə 2013-cü ildə həmin proqramı kökü ilə bərabər qopardı və əməkdaşlığı dayandırdı”, – deyə Qriqoryan əlavə edib.

O qeyd edib ki, Ermənistan hazırda fiziki olaraq öz yolunu seçə bilmir və ona nə diktə olunursa, onu da edir. Daha sonra o bildirib ki, Ermənistan Avrasiya İqtisadi İttifaqında olmayacaq. Orada olsa belə, yalnız Türkiyənin bir hissəsi kimi olacaq. Onun sözlərinə görə, Türkiyə tezliklə Ermənistan bazarına girəcək və Ermənistan məhsullarını boğub sıradan çıxaracaq. Üstəlik, ölkəyə keyfiyyət baxımından çox şübhəli Türkiyə məhsulları gətiriləcək.

“Bizdə konkret video nümunəsi var: türk fermeri deyir ki, o, kürdlərə və ermənilərə satdığı məhsulu türklərə satmır. Çünki həmin məhsul zəhərli kimyəvi maddələrlə işlənib. Eyni şey cücərmiş buğdaya da aiddir. Onun qida üçün istifadəsi qadağandır, çünki “fuzarium” adlı zəhərli göbələklə zəhərlənmə ehtimalı yüksəkdir. Hələ digər yan təsirləri demirəm. Qırğızıstan və Moldovadakı həmkarlarıma səslənirəm: baxın görün, onlar [Qərb] Ermənistanla nə etdilər və bizim səhvlərimizi təkrarlamayın. Çünki səhiyyə sistemi həm Qırğızıstanda, həm Moldovada işğal altındadır”, – Qriqoryan bildirib.

O əlavə edib ki, Ermənistan elə vəziyyətdədir ki, onu təcili əməliyyat masasına qoymaq lazımdır. “Türkiyənin vilayətinə çevriləndən sonra bunu etmək mənasız olacaq”, – Qriqoryan sözlərini tamamlayıb.

Bu şəxsin bəyanatları elə təəssürat yaradır ki, sanki insan reallıqdan tam qopub, fantaziyalarla yaşayır və ya hadisələri təhrif olunmuş güzgüdən izləyir. Bunu nə ilə izah etmək olar? Sirr olaraq qalır. Fotoda Qriqoryan kifayət qədər adekvat görsənir. Bəs onu beynəlxalq konfransda bu qədər dəhşətli proqnozlar səsləndirməyə vadar edən nədir? Burada hansı versiyalar ola bilər?

Tanınmış ekspertlər bununla bağlı fikirlərini Pressklub.az-la bölüşüblər.

Tanınmış erməni analitiki və publisisti İşxan Verdyan bildirib ki, o, bu konkret şəxsin davranışını xüsusi və fərqli bir hal kimi ayırmazdı, çünki bu, bütün sistemin sindromudur.

“Ermənistanın keçmiş elitası açıq-aşkar dalana dirənib və son ölüm-dirim savaşına girib. Qriqoryan isə sadəcə olaraq, həqiqətən can atdığı dünyanı təsvir edir. Onun dedikləri faşist-revanşist dünyagörüşünə tam uyğun gəlir; onlar üçün suveren Ermənistan Respublikası prinsipcə mövcud olmaya da bilər”, – Verdyan hesab edir.

Beynəlxalq məsələlər üzrə ekspert, “Cənubi Qafqaz” politoloqlar klubunun rəhbəri İlqar Vəlizadə isə qeyd edib ki, ümumilikdə burada mənzərə son dərəcə aydındır: bu tip fəaliyyət göstərən şəxslər belə ritorikanı fəal şəkildə istifadə edirlər. Çünki buna şərait yaradan mühit var – uzun illər çaşdırılmış, aldadılmış cəmiyyət.

“Bu cəmiyyət illərlə “Qarabağ klanı”nın Azərbaycan və Türkiyəyə qarşı aqressiv məqsədlərinin reallaşdırılması üçün əlverişli alət olmuşdu. Bu vəziyyət avtomatik olaraq Paşinyana da keçdi və o da öz rəhbərliyinin ilk illərində həmin ritorikanı fəal şəkildə davam etdirdi.
Lakin Ermənistanın İkinci Qarabağ müharibəsində məğlubiyyətindən, Azərbaycanın ərazi bütövlüyünü tanımasından və Qarabağı Azərbaycan ərazisi kimi qəbul etməsindən sonra siyasi səhnədə dəyişikliklər baş versə də, milyonlarla insanın psixologiyasındakı zədə hələ də qalmaqdadır. Onlar hələ də Qriqoryanın dediyi həmin təsəvvürlərlə yaşayırlar. Bu səbəbdən revanşist dairələr bu ab-havadan maksimum istifadə edir, manipulyasiya yolu ilə geri dönüş üçün zəmin yaratmağa çalışırlar. Onlar bunu son onilliklər ərzində necə edirdilərsə, indi də elə davam etdirirlər”, – politoloq vəziyyəti təsvir edib.

O əlavə edib ki, mənzərə, əlbəttə, nikbin deyil. “Niyə? Çünki söhbət bir-iki insandan yox, kifayət qədər böyük sayda insandan, erməni cəmiyyətinin bir hissəsindən gedir. Aydın məsələdir ki, məqsəd yenidən böyük siyasətə dönüş üçün zəmin yaratmaqdır.
Paşinyanın əsas vəzifəsi isə insanlara, cəmiyyətə onun və əvvəlki hakimiyyətlərin illərlə istifadə etdiyi həmin ritorikanın yalan olduğunu başa salmaqdır. Bu ritorika erməni ictimai fikrinin çaşdırılması üçün idi. Belə məsələləri faktlara söykənərək ardıcıl şəkildə izah etdikdə, Qriqoryan kimi insanların bəyanatları heç bir əhəmiyyət kəsb etməyəcək”, – Vəlizadə yekunlaşdırıb.