Redaksiyamıza Çanqan avtomobili ilə bağlı şikayət ünvanlayan vətəndaş Məmmədov Rüfət Əlican oğlu bildirib ki, 2023-cü il, avqust ayının 23-də Çanqan Uni V modeli maşın alıb. Maşını Babək də yerləşən rəsmi mağazadan aldığını bildirən şikayətçi Qeyd edib ki, hal-hazırda həmin mağaza Əhməd Rəcəbli ünvanında, “Şəki” restoranının yaxınlığında yerləşir.
Tribunainfo.az-a açıqlama verən şikayətçi R. Məmmədov qeyd edib ki, ilkin ödəniş olaraq 4800 AZN ödəyib.
Mağaza Rüfət Məmmədovdan salafan üçün 150 manat pul da alıb. Ümumi olaraq ilkin ödəniş 5000 manatla maşını alan Rüfət Məmmədov əsas problemdən söz açıb:
“2024-cü il, oktyabrın 28-də Bakıya yağan güclü yağışdan sonra maşını iş yerinin yanında saxlamışdım. 2-3 saatdan sonra maşına minmək istəyəndə, gördüm ki, maşının içi su ilə dolub. Həmin gündən öncə də Bakıya yağan yağışdan sonra maşının içi su ilə dolu idi. Mən maşını aldığım mağazaya və sığortaya hadisə ilə bağlı məlumat verdim. Hətta, sığortadan çəkiliş edildiyi əsnada mən maşına dolmuş suyu boşaltdım. Eyibarnaməmin vaxtı da hələ qalmışdı. Mən maşını Çanqan mağazasına apardım ki, suyun maşının içinə haradan daxil olduğunu tapsınlar. Çünki maşına 5 il zəmanət veriblər. Onlar da, heç problemi tapa bilmədilər. Hətta, şirkət məndən təmir üçün pul tələb etdi. Mən etiraz etdim. Maşın orada qaldı. Bir neçə aydan sonra isə Çanqan mağazası mənim maşınımı satdı. Mən də həmin günə qədər 19 200 manat pul ödəmişdim. Həmin vaxt maşının salon qiyməti 42 900 AZN idi. O puldan da əlavə indi məndən pul istəyirlər. Ortada da maşın yox… Maşını Çanqan mağazasına qoyduqda sığorta ilə bağlı hadisə olmuşdu. Sığorta da pul köçürməli idi. Ön “bufer”ində problem vardı. Köçürülüb-köçürülmədiyini də bilmirəm. Çünki Çanqan-a köçürüləcəkdi. Mənə dəyən ziyanın heç olmasa bir hissəsinin qarşılanmasını istəyirəm”.
Məsələ ilə bağlı sorğumuza Azərbaycan Avtomobil Evi MMC-nin mətbuat xidmətindən bildirilib ki, sözügedən müştəri nisyə alqı-satqı müqaviləsi ilə nəqliyyat vasitəsi əldə edib. Həmin müqavilənin şərtlərinə görə, nəqliyyat vasitəsinin ilkin ödənişini həyata keçirib. Biz də həmin nəqliyyat vasitəsini həmin şəxsin istifadəsi üçün vermişik. Alıcı hər ay ödəniş etdiyi təqdirdə, biz ona etibarnamə təqdim edirik. Müqavilə şərtlərimizə görə, iki ay ardıcıl ödənişi həyata keçirməsə, biz müqaviləyə birtərəfli qaydada xitam verib nəqliyyat vasitəmizi geri götürə bilərik. Çünki öz mülkiyyətimizdə olan maşındır. Sözügedən alıcı dəfələrlə ödəniş öhdəliklərini pozub. Biz, də məcbur olub məhsulu geri götürmüşük. Təbii ki, biz, də istəmərik müştəri ilə müqaviləmizə xitam verək. Bizim də hüququmuz var ki, xitam verilən məhsulu 3-cü şəxslərə sataq. Hətta şəxs barəsində məhkəməyə də müraciət etmişik. Çünki nəqliyyat vasitəsini istifadə edən zaman ona zərər vurub. Biz də həmin zərərin əvəzini tələb edirik. İşə də məhkəmə müstəvisində qiymət veriləcək.
Hadisə ilə bağlı Antiinhisar və İstehlak Bazarına Nəzarət Dövlət Agentliyindən bildirilib ki, zərərçəkən müştəri hüquq-mühafizə orqanlarına müraciət etməlidir.
