Ermənistan Respublikasının Antikorrupsiya Komitəsinin məlumatına görə, Gümrü şəhərinin meri Vardan Qukasyan və şəhər administrasiyasının bir neçə əməkdaşı korrupsiya işi üzrə saxlanılıb. Komitədən verilən məlumata görə, məmurlar təxminən 1,5 min kvadratmetr sahəsi olan və sökülməsi nəzərdə tutulan qanunsuz tikilinin sahibi ilə gizli razılaşma əldə ediblər. Razılaşmaya görə, söküntüdən imtina və tikintinin guya qanuniliyini təsdiqləyən saxta sənədlərin verilməsi müqabilində binanın sahibi məmurlara 4 milyon dram verməli imiş.

İstintaqın iddiasına əsasən, Qukasyan bu işi baş memarla əvvəlcədən razılaşdıraraq həyata keçirib. Onlar binanın sahibi ilə görüşərək rüşvətin mərhələlərlə verilməsi barədə anlaşmaya gəliblər. “Sputnik Ermənistan” yazır ki, söhbət “Fabrika” mağazalar şəbəkəsinin sahibi Sevak Qomcyandan gedə bilər. Bundan əlavə, istintaqın məlumatına görə, qrup üzvləri şəhər şurasının deputatları barədə kompromat məlumat toplayaraq onları şantaj yolu ilə nəzarətdə saxlamağa çalışıblar. Qukasyana qarşı meriyaya məxsus torpaq sahəsini başqa şəxsin adına özəlləşdirməyə cəhd göstərmək ittihamı da irəli sürülüb.

Qeyd edək ki, Gümrü Ermənistanın ikinci böyük şəhəridir və burada Rusiyanın Cənubi Qafqazdakı əsas hərbi obyektlərindən biri olan 102-ci hərbi baza yerləşir. Qukasyan 2025-ci ilin aprelində ikinci dəfə şəhərin meri seçilib. O, seçkilərdə Ermənistan Kommunist Partiyasının namizədi kimi iştirak edib. Siyasətçi Ermənistanın Rusiya ilə yaxınlaşmasının tərəfdarı kimi tanınır. O, dəfələrlə Moskva ilə “Rusiya və Belarus nümunəsində” ittifaq dövləti yaratmağa çağırıb və bu cür inteqrasiyanın “Ermənistan üçün xilas yolu” olduğunu vurğulayıb.

Bu ilin fevralında Qukasyan qanunsuz silah saxlamaqda şübhəli bilinərək saxlanılmış, lakin daha sonra azadlığa buraxılmışdı. Onun vəkili həmin işin siyasi xarakter daşıdığını və seçkilərlə bağlı olduğunu bildirmişdi. Qukasyan bundan əvvəl 2026-cı ildə baş nazir postuna namizədliyini irəli sürmək niyyətində olduğunu açıqlamışdı.

Siyasətçinin saxlanılması xəbərindən sonra insanlar Gümrü meriyası qarşısında toplaşmağa başlayıblar. Hüquq-mühafizə orqanları binanın girişini bağlayıb, işçilər də daxil olmaqla heç kimin içəri girməsinə və çıxmasına icazə verməyiblər. Yığışan insanlar onları fitə basaraq “Ar olsun!” şüarları səsləndiriblər.

Beləliklə, ölkənin ikinci şəhərində narazılıq yaranıb. Ermənistanın müxtəlif müxalifət partiyalarının nümayəndələri və kilsə xadimləri isə vəziyyətdən istifadə edərək gün boyu baş nazirin siyasətinə qarşı çıxışlar ediblər.

Hər şeydən görünür ki, Nikol Paşinyan Ermənistanın siyasi meydanını revanş tərəfdarlarından təmizləmək kursunu davam etdirir. Və çox güman ki, Qukasyanın 2026-cı ildə baş nazir olmaq niyyətini bəyan etməsi bu prosesdə həlledici rol oynayıb. Ermənistan rəhbərliyinin bu addımının Kreml tərəfindən narazılıqla qarşılanacağı istisna edilmir.

Ortaya maraqlı sual çıxır: Ermənistanda baş verənlərlə hazırda Azərbaycanda Prezident Administrasiyasının keçmiş rəhbəri ətrafında baş verən hadisələr arasında müəyyən paralellər aparmaq olarmı? Xatırladaq ki, Ramiz Mehdiyevə qarşı Cinayət Məcəlləsinin 278.1-ci (dövlət hakimiyyətinin ələ keçirilməsinə yönəlmiş hərəkətlər), 274-cü (dövlətə xəyanət) və 193-1.3.2-ci (cinayət yolu ilə əldə edilmiş əmlakın leqallaşdırılması) maddələri üzrə ittiham irəli sürülüb.

Yəni, həm Ermənistanda, həm də Azərbaycanda Rusiya amili ilə bağlı oxşar proseslər getdiyini söyləmək olarmı?

Pressklub.az-ın suallarını “Azadlıq Radiosu”nun jurnalisti, Şərqi Avropa ölkələri üzrə rusiyalı ekspert Vadim Dubnov cavablandırıb.

Dubnov hesab edir ki, Ermənistanda və Azərbaycanda baş verənləri bir-biri ilə müqayisə etmək doğru deyil. “Bu, iki tamamilə fərqli prosesdir. İlham Əliyev köhnə elita ilə məsələləri həll edir, Moskva ilə münasibətlər səhifəsini çevirir. Paşinyan isə seçkilərə hazırlaşır. Onun addımları kifayət qədər şəffaf və aydın görünür. O, doğrudan da Ermənistanın siyasi meydanını təmizləyir – təkcə revanş tərəfdarlarından deyil, müxalifətin daxilində liderlik potensialı olan hər kəsdən. Çünki Vardan Qukasyan Paşinyanın qarşıdakı seçkilərdə həyatını çətinləşdirə biləcək azsaylı fiqurlardan biridir. Qalanları ya zəifdirlər, ya da Robert Koçaryan kimi siyasi resursları tükənib. Bəzilərinin, məsələn hazırda həbsdə olan Samvel Karapetyanın siyasi gələcəyi isə kifayət qədər qeyri-müəyyəndir”, – ekspert bildirib.

Dubnovun fikrincə, bu mənada Paşinyanın bəxti bir qədər gətirib.
“Elə gətirib ki, ona qarşı çıxanlar Moskvaya yaxın olan şəxslərdir. Amma bu, onlarla mübarizənin səbəbi deyil – sadəcə, təsadüfdür. Bu da Paşinyana 2026-cı il seçkilərindəki mübarizəsini “Ermənistanı Avropadan uzaqlaşdıran qaranlıq qüvvələrə qarşı mübarizə” kimi təqdim etməyə imkan verir”, – Dubnov qeyd edib.