Hələ başlamadan bitən Tramp və Putinin Budapeşt sammiti “hekayəsi” ABŞ prezidentinə Ukraynada savaşı bitirmək üçün necə addım atmalı olduğunu göstərdi – Kremlə güclü təzyiq göstərilməlidir.
Axar.az xəbər verir ki, bu barədə “Vaşinqton Post”da yayımlanan məqalədə deyilir.
Qeyd edilir ki, Macarıstanda keçiriləcək sammit planı bir həftədən də az müddətdə iflasa uğrayıb. Amerikalıları rusların Ukraynanı bir dövlət kimi məhv etmək niyyətindən əl çəkmədiklərinə inandırmaq üçün ABŞ dövlət katibi Marko Rubio ilə Rusiya xarici işlər naziri Sergey Lavrov arasında cəmi bir telefon danışığı lazım idi.
“Oxşar hadisə Alyaska ilə də baş verib. O zaman amerikalılar da rusların zahirən danışıqlara hazır olduqlarını düşünürdülər, lakin sonradan bunun belə olmadığı aydın oldu. Amerikalılar nəhayət bunu başa düşdükdən sonra Ukraynanın Rusiya neft emalı zavodlarına qarşı zərbə kampaniyasına kəşfiyyat dəstəyi verməyə başladılar.
Lakin Budapeştdəki zirvə hələ başlamamış bitdi, çünki amerikalılar hər şeyi daha tez başa düşdülər”, - deyə məqalədə bildirilib.
