Xəbər verdiyimiz kimi, “Bank of Baku” iki il öncə dəm qazından boğularaq dünyasını dəyişən 44 günlük Vətən Müharibəsi qazisi Səbuhi Məmmədovun ailəsini kredit borcuna görə məhkəməyə verib. İlk məhkəmə sentyabrın 1-də Şirvan Şəhər Məhkəməsində keçirilib. Digər məhkəmə isə sentyabrın 22-nə təyin olunub.
Bank ictimai qınağa, tənqidlərə rəğmən şikayətini geri çəkməyib. Hətta bank işçilərindən biri qazinin tək yaşayan anasına qarşı, - “borcu ödəyin ki, oğlunuzu o dünyada inkir-minkir narahat etməsin”,-deyə utancverici və biabırçı cümlə də işlədib.
Maraqlısı budur ki, Vətən Müharibəsi iştirakçısının anası ilə 3 100 manatın “davasını döyən” bank hər il milyonlarla mənfəət əldə edir.
Bizim.Media bankın son 5 ildəki mənfəətini araşdırıb.
2020
“Bank of Baku”nun 2020-ci ildəki aktivləri 28 mln. 469 min manat artaraq 409 mln. 563 min manata yüksəlib. Bankda yerləşdirilən depozitlər 10 mln. 263 min manat artaraq 193 mln. 485 min manata çatıb.
“Bank of Baku” cəmi kapitalını 2020-ci ilin sonunda 76 mln. 398 min manat olaraq tamamlayıb.
Bankın faiz gəliri 53 mln. 602 min manat, xalis faiz gəlirləri 41 mln. 957 min manat olub. Qeyri-faiz gəlirləri 9 mln. 397 min manat olduğuna görə “Bank of Baku”nun əməliyyat mənfəəti 13 mln. 527 min manata yüksəlib. Bankın sözügedən il üzrə xalis mənfəəti 15 milyon olub.
2021
2020-ci illə müqayisədə 2021-ci ildə bankın xalis mənfəəti 2,2 dəfə artıb. 2020-ci ildə 15 milyon manat xalis mənfəət əldə edən bank, 2021-ci ildə bu göstəricini 23 milyon 60 min manat milyon manata çatdırıb.
Aktiv və öhdəlikləri əvvəlki ilin göstəriciləri ilə müqayisədə 20%-dən çox artaraq, uyğun olaraq 519,5 milyon manat və 402,2 milyon manat olub.
2022
Bank of Baku” ASC 2022-ci ili 36 milyon 866 min manat xalis mənfəətlə başa vurub. 2021-ci ilin eyni dövrü ilə müqayisədə bank 60% artıma nail olub.
2022-ci ildə “Bank of Baku”nun cəmi gəlirləri 111 milyon 874 min manat (illik müqayisədə 44% çox) olub. Nəticədə bankın 34 milyon 98 min manatlıq əməliyyat mənfəəti yaranıb.
2023
“Bank of Baku” ASC 2023-cü ildə 25.5 milyon manat xalis mənfəət əldə etməklə, balansındakı bölüşdürülməmiş mənfəəti 76.95 milyon manata qalxıb. 2023-cü ildə "Bank of Baku"nın cəmi əməliyyat gəlirləri (faiz və qeyri-faiz gəlirləri) 141 milyon 721 min manat, cəmi əməliyyat xərcləri (faiz və qeyri-faiz xərcləri) 114 milyon 665 min manat, gəlirlər xərclərini üstələdiyindən əməliyyat mənfəəti 27 milyon 56 min manat təşkil edib.
"Bank of Baku"nın cəmi aktivləri 169 milyon 658 min manat və ya 24,2% artaraq 31 dekabr 2023-cü il tarixində 870 milyon 890 min manata çatıb.
2024
Bank il ərzində 25.9 milyon manat xalis mənfəət əldə edib ki, bu da keçən ilin müvafiq dövründəki 25.5 milyon manatlıq mənfəətlə müqayisədə artımdır. Cəmi faiz gəlirləri 152.7 milyon manat olmaqla bu 2023-cü ilin göstəricisindən (128.3 milyon manat) 19.0% çoxdur. Müştərilərə verilmiş kreditlər üzrə faiz gəlirləri 144.3 milyon manat təşkil edərək əsas paya sahib olub.
Qeyri-faiz gəlirləri illik 39.7% artımla 18.7 milyon manata yüksəlib.
2025
Bankın 2025-ci ilin birinci yarısında 14 milyon 135 min manat xalis mənfəət əldə edib. Bankın xalis mənfəəti ötən ilin eyni dövrü ilə müqayisədə 3 milyon 126 min manat və ya 28,4% artıb.
Göründüyü kimi, bank son 5 illik müddəti yüksək xalis mənfəətlə yekunlaşdırıb. Söhbət 2-3 mindən yox, milyonlardan gedir. Yəni, 3 100 manatlıq krediti öz canını bu torpaq üçün fəda etməyə hazır olan, müharibədə iştirak edib sağlamlığını itirən qəhrəmana, sonda da faciəvi şəkildə həyatını itirənə bağışlamaq bu qədər çətin olmalı deyildi. Lakin bank təkcə bir rübdə 14 milyon qazanmasına rəğmən, qazinin anasını şikayət etmək, məhkəməyə verib onu incitmək yolunu daha üstün tutub.
Təəssüf ki, bunlardan ən uyğunsuzu isə Səbuhinin anasına qarşı göstərilən rəftar olub. Özünü bank işçisi kimi təqdim edən ortayaşlı vəkil öz borcunu layiqincə yerinə yetirmiş qəhrəmanın anası - Sevinc Məmmədovaya bildirib ki, 3 100 manatlıq borcu saxlamaq olmaz, yoxsa Səbuhini o dünyada “inkir-minkir” narahat edə bilər.
Qeyd edək ki, S.Məmmədova artıq digər məhkəmə prosesi barədə də məlumatlandırılıb. Sözügedən məhkəmə prosesi 22 sentyabr Şirvan Şəhər Məhkəməsində keçiriləcək.
Bizim.Media
