Azərbaycan vətəndaşı Rusiyada “terror aktları” hazırlamaq iddiası ilə saxlanılıb.
Rusiya Federal Təhlükəsizlik Xidməti (FSB) Azərbaycan vətəndaşının saxlanılması barədə məlumat yayıb.
Qurumun açıqlamasına görə, həmin şəxs Rusiyada qadağan olunmuş “Ukrayna terror təşkilatı”na qoşulmaqda ittiham olunur. Bildirilir ki, o, təşkilat rəhbərlərinin göstərişi ilə Stavropol və Yessentukidə hüquq-mühafizə orqanlarının binaları və nəqliyyat infrastrukturunda kəşfiyyat aparıb. Saxlanılan şəxsə “terror aktına hazırlıq maddəsi” ilə cinayət işi açılıb.
Son aylarda Azərbaycan və Rusiya arasında münasibətlərdə gərginlik davam edir. Moskvanın Azərbaycana qarşı sərt ritorikası, Rusiyada azərbaycanlıların sıxışdırılması və hüquqi problemlərlə üzləşməsi barədə məlumatlar gündəmdədir. Eyni zamanda, Rusiya ordusunun Ukrayna ərazisində Azərbaycana məxsus enerji obyektlərini hədəf alması da iki ölkə arasında əlavə gərginlik yaradır.
Buna baxmayaraq, Rusiya rəsmiləri zaman-zaman Azərbaycanla münasibətlərin normallaşdırılmasını istədiklərini bildirirlər. Lakin son hadisələr və Rusiyada yaşayan azərbaycanlılarla bağlı addımlar əməldə bu bəyanatların təsdiqini göstərmir. Saxlanma və təqib hallarının davam etməsi, tərəflər arasında etimad mühitinin hələ formalaşmadığını ortaya qoyur.
Politoloq Elçin Alıoğlu Sherg.az-a bildirib ki, əslində, baş vermiş hadisə barədə hələlik dəqiq və ətraflı məlumat yoxdur:
"Bu baxımdan konkret fikir bildirmək də çətindir. Azərbaycanda və Rusiyada yayılan xəbərlər isə sadəcə düşündürücü məqamlar ortaya qoyur. Əgər Rusiyanın daxilində Azərbaycan əsilli şəxslərin terror aktı hazırladığı iddia edilirsə, bunun üçün yetərincə dəlil təqdim olunmalıdır. Burada söhbət Rusiyada yaşayan vətəndaşlıq almış azərbaycanlıdan gedir, yoxsa vətəndaşlığı olmayan bir şəxsdən? Bu sualların aydınlaşdırılmasına ciddi ehtiyac var. Digər tərəfdən, hər hansı bir xüsusi təyinatlı vətəndaşın Rusiyaya gedərək terror fəaliyyətinə qoşulması məsələsi də inandırıcı görünmür. İstənilən halda istintaqın gedişatını gözləmək lazımdır. Bununla belə, bəzi nüanslara diqqət yetirmək olar. Rusiyada baş verən son hadisələri nəzərə alsaq, bu saxlanmanın nümayişkaranə şəkildə aparılması və onun Ukrayna–Rusiya münaqişəsi ilə bağlı terror şəbəkəsinə bağlanması ciddi şübhələr doğurur. Adətən belə hallarda saxlanılan şəxsin ad və soyadının ən azı baş hərfləri açıqlanır, amma bu dəfə belə bir məlumat da verilməyib.
Rusiyada son dövrlərdə müşahidə olunan proseslər göstərir ki, yayılan xəbərlərin əksəriyyəti real araşdırmalara əsaslanmır, daha çox kütləvi informasiya vasitələri üzərindən siyasi məqsədlərlə tirajlanır. Bu səbəbdən də verilən məlumatların bir qismi dezinformasiya xarakteri daşıyır. İstintaqın nəticələri məlum olmadan fikir yürütmək erkən və yalnız emosional reaksiyaya səbəb ola bilər".
Bakı-Moskva münasibətlərinə gəlincə, analitik əlavə edib ki, bu əlaqələr artıq əvvəlki formatına və səviyyəsinə qayıtmayacaq:
"Çünki Rusiya tərəfdən kifayət qədər çirkin, neqativ, siyasi əxlaqdan kənar addımlar, təhdidlər və ismarıclar olub. Buna görə də əvvəlki münasibətlər mümkün deyil. Sadəcə müəyyən addımlar atılacağı təqdirdə əlaqələrin normal məcraya qayıtması mümkündür. Bunun üçün isə Rusiya Azərbaycana qarşı apardığı hibrid müharibədən, informasiya savaşından və təhdid, qısnama cəhdlərindən əl çəkməli, “AZAL” təyyarəsinin vurulması ilə bağlı məsuliyyəti qəbullanıb təzminat ödəməlidir. Həmçinin Kreml sığorta ilə təzminatı qarışdırıb bütün azərbaycanlıları cahil, savadsız hesab etməməlidir. Üstəlik, Rusiyada yaşayan azərbaycanlılara qarşı kütləvi təqib və total təzyiqlərə son qoyulmalıdır. Ancaq bütün bunlar həyata keçirilsə belə, münasibətlər heç vaxt əvvəlki kimi olmayacaq. Yalnız müəyyən qədər normallaşa bilər".
