“Son baş verən proseslərə diqqətlə nəzər yetirəndə, bir çox maraqlı məqamı görmək mümkündür”.
Bu sözləri politoloq Zəlimxan Məmmədli “Cümhuriyət”-ə açıqlamasında deyib.
Onun sözlərinə görə, ABŞ-nin son zamanlar Cənubi Qafqazla bağlı atdığı addımlar müsbətdir:
“Nəzərə alaq ki, ABŞ Türkiyə ilə Yaxın Şərqdə ciddi layihələr həyata keçirməkdədir. Bundan başqa, rəsmi Vaşinqton Cənubi Qafqazdakı siyasətə də dəstək verir. Eyni zamanda, ABŞ Rusiyanı bölgədən və Yaxın Şərqdən çıxarmağa çalışır.
Azərbaycan da Türkiyə ilə strateji müttəfiqdir. Yəni qardaş olsaq da, siyasi terminologiyada siyasi müttəfiqik. Bu baxımdan, Türkiyə və Azərbaycanın ABŞ ilə münasibətlərinin yaxşı olması olduqca faydalıdır”.
Ekspert qeyd edib ki, Rusiya və İran çökmək üzrədir:
“Əslində, Azərbaycan avroatlantik məkanda yerləşir. Sadəcə olaraq Rusiya və İran faktoruna görə bunu leksikonumuzdan çıxarmışıq. Çünki adıçəkilən ölkələr ABŞ-nin, NATO-nun və Qərbin düşmənləridir.
İndiki zamanda isə tamam fərqli vəziyyət yaranıb. Belə ki, hazırda Rusiya və İran kifayət qədər çökmüş vəziyyətdədir. Rusiyanın və İranın ritorikaları artıq işə yaramır. Hesab edirəm ki, həm İranda molla rejiminin, həm də Rusiyada Putin hakimiyyətinin çöküşü ərəfəsindəyik”.
Politoloq hesab edir ki, ABŞ ilə tərəfdaşlıq Rusiya ilə müttəfiqlikdən daha yaxşıdır:
“Son zamanlar xeyli zəifləyən Rusiya və İran həm Qafqazdan, həm də Yaxın Şərqdən çıxarılır. Xüsusilə onların Suriyada başlarına gələnlər hamıya yaxşı məlumdur. Belə bir halda, Zəngəzur dəhlizinin açılması prosesini sürətləndirmək lazımdır. Ümumiyyətlə, strateji olaraq böyük əhəmiyyətə malik olacaq Zəngəzur dəhlizi həm də bölgədə sabitliyin, qardaşlığın və iqtisadi rifahın mərkəzinə çevriləcək.
Son zamanlarda Zəngəzur dəhlizi prosesində ABŞ-nin də iştirak edəcəyi iddiaları yayılıb. Düşünürəm ki, Rusiyadansa, Türkiyənin müttəfiqi olduğu ABŞ ilə tərəfdaşlıq min dəfə daha yaxşıdır”.
Zəlimxan Məmmədlinin fikrincə, Azərbaycan, Türkiyə və ABŞ ortaq bir layihənin içərisindədir:
“Hətta bura yeri gələndə Ermənistanı da qatmaq olar. Ümumiyyətlə, ABŞ ilə Azərbaycan münasibətlərinin yaxşılaşması ilə Cənubi Qafqazda yeni dönəm başlayır. Hesab edirəm ki, Azərbaycan-Türkiyə-ABŞ başda olmaqla, region dövlətlərinin əməkdaşlığı müstəvisinə keçirik.
Bütün bunlar onu göstərir ki, bizim siyasi xəttimiz doğrudur, düzgündür. Çünki ABŞ-Azərbaycan münasibətlərinin pozitiv istiqamətdə düzəlməsi həm ölkəmizin, həm də regionun təhlükəsizliyi baxımından əhəmiyyətlidir”.
