Nijni Novqorodda cinayət iyerarxiyasında yüksək mövqe tutmaqda ittiham olunan Zviad Tbilisski kimi tanınan “qanuni oğru” Zviad Ozmanyanın məhkəməsi başlayıb. İstintaqın versiyasına görə, təqsirləndirilən şəxs “qanuni oğru” statusundan istifadə edərək cəzaçəkmə müəssisələrinə nəzarət edib, digər oğruların taclandırılmasında (koronasiya) iştirak edib, “avtoritetlər” təyin edib və quldurluq cinayətinə görə uzunmüddətli cəzasını çəkdiyi həbsxanada “obşak”ın (ümumi kriminal büdcənin) maliyyə vəsaitlərini artırmağa çalışıb.

Zviad Ozmanyan özünü təqsirli bilməyib və şərh verməkdən imtina edib.

Vəkili isə iddia edir ki, o, cəzasını ciddi nəzarət altında, təkadamlıq kameralarda və cərimə izolyatorlarında çəkdiyi üçün digər məhkumları nəzarətdə saxlamaq imkanına malik olmayıb.

Zviad Ozmanyana bu statusla bağlı ittiham azadlığa çıxmasına cəmi bir neçə gün qalmış, 2024-cü il iyulun 24-də irəli sürülüb. Ona qarşı Cinayət Məcəlləsinin 210.1-ci maddəsi üzrə — cinayət iyerarxiyasında ali mövqe tutmaqda ittiham elan olunub.

Elan olunmuş ittiham aktına əsasən, 2014–2024-cü illər ərzində təqsirləndirilən şəxs “qanuni oğru” statusundan istifadə edərək məhkumlara nəzarət edib, cinayətkar büdcəyə — “obşak”a — vəsait toplayıb, günahkar sayılan şəxsləri cəzalandırıb, cinayət gəlirlərini bölüşdürüb, həmçinin “qanuni oğrular” tərəfindən səlahiyyətləndirilmiş şəxslər — “smotryaşiy” və “polojenets”ləri (nəzarətçilər) təyin edib.

Zviad Tbilisski ləqəbli Zviad Ozmanyan 2013-cü il fevralın 11-də Moskvada “qanuni oğru”lar Temuri Mirzoev, Gizo Kardava, Salmanul-Parusey Abdurzakov, Revaz Kaxmazov, azərbaycanlı Vaqif Süleymanov, Baxış Əliyev və digər kriminal “avtoritetlər” tərəfindən “taclandırılıb”. Onun cinayətkar qabiliyyətləri hələ 2008–2013-cü illərdə Aslan Usoyanın (Ded Xasan) rəhbərlik etdiyi Tbilisi cinayət klanının nümayəndələrinin diqqətini cəlb etmişdi.

2013-cü ildən etibarən Zviad Ozmanyan Türkiyə və Rusiyada keçirilən “sxodka”larda 15 “qanuni oğru”nun taclandırılmasında iştirak edib.

Jurnalistlərin “Siz “qanuni oğru”sunuzmu?” sualına isə o, belə cavab verib: “Mən pravoslav xristianam.”

Məhkəmə araşdırması avqust ayında təqsirləndirilən şəxsin dindirilməsi ilə davam edəcək.

Ardınca məhkəmə cinayət işinin materiallarını araşdıracaq və həbsxana rəhbəri də daxil olmaqla şahidləri dindirəcək.

Xatırladaq ki, bir neçə il əvvəl mərhum azərbaycanlı “qanuni oğru” Lotu “Quli”nin dostları Zviad Tbisskini “oğru” adından məhrum ediblər. Buna səbəb onun “ümumi fond” üçün yığılan pulları oğurlaması olub.

lent.az