Ukraynanın xarici işlər naziri Andrey Sibiha Bakıda Azərbaycan Prezidenti İlham Əliyevlə görüş keçirib. Bu barədə Ukrayna Xarici İşlər Nazirliyinin mətbuat xidməti məlumat verib.

Nazirliyin məlumatına əsasən, tərəflər Ukrayna ilə Azərbaycan arasındakı ikitərəfli münasibətləri və beynəlxalq gündəmin aktual məsələlərini açıq və ətraflı şəkildə müzakirə ediblər. Görüşdə xüsusi olaraq Rusiyanın təcavüzünün dayandırılması və ədalətli, davamlı sülhün bərqərar olunması məsələlərinə diqqət yetirilib.

Andrey Sibiha Azərbaycan Prezidentinə Ukraynanın ərazi bütövlüyünə verdiyi prinsipial dəstəyə, eləcə də qış mövsümündə göstərilən humanitar və enerji yardımına görə təşəkkür edib.

Görüş zamanı iki ölkə arasında strateji tərəfdaşlığın inkişafı ilə bağlı gələcək addımlar da müzakirə olunub. Xarici işlər naziri bildirib ki, bu istiqamətdə növbəti mühüm mərhələ Azərbaycanın 10–11 iyul tarixlərində Romada keçiriləcək Ukraynanın Bərpası Konfransında iştirakıdır.

Qeyd edək ki, Rusiya-Ukrayna müharibəsinin başladığı vaxtdan etibarən bu, Kiyev tərəfindən Bakıya ilk yüksək səviyyəli səfər kimi qiymətləndirilir. Azərbaycan rəhbərliyi müharibə şəraitində olan Ukraynaya humanitar yardım göstərməkdən heç vaxt çəkinməyib. Amma, məsələn, bu ölkənin təcavüzə qarşı mübarizə hüququnun müdafiəsini hədəfləyən beynəlxalq konfranslarda iştirakdan və bu mövzuda açıq şəkildə həmrəylik bəyan etmədən çəkinirdi.

Və indi biz ilk dəfə eşidirik ki, Bakı 10–11 iyul tarixlərində Romada keçiriləcək Ukraynanın Bərpası Konfransında iştirak edəcək.

Bütün bunlar nə deməkdir? Həm Ukrayna XİN rəhbərinin səfəri, həm də konfransda iştirakla bağlı razılıq – bunlar Moskvaya ünvanlanmış mesajdırmı? Azərbaycan rəhbərliyi Kremlə göstərmək istəyir ki, artıq heç bir formada ondan asılı deyil? Yoxsa bu addımlar başqa cür şərh olunmalıdır?

Pressklub.az saytı bu sualları təhlükəsizlik və müdafiə sahəsi üzrə tanınmış ukraynalı ekspert Oleq Starikova ünvanlayıb.

O, dərhal qeyd edib ki, nə indi, nə də əvvəl Azərbaycan Respublikasının rəsmi hakimiyyəti tərəfindən kiməsə nəyisə sübut etmək niyyətini müşahidə etməyib: “Prezident İlham Əliyev uzun illərdir ki, ölçülüb-biçilmiş, ağıllı diplomatik xətt aparır, ikitərəfli münasibətləri milli maraqlar əsasında qurur. Bu baxımdan, Ukrayna Azərbaycanın təcrübəsindən çox şey öyrənə bilər. Emosiyalar deyil, ağıl, hay-küylü deyil, həqiqətən intellektual diplomatiya – bu, Azərbaycanın strategiyasıdır. Bu xətti Heydər Əliyev qoyub, İlham Heydər oğlu isə onu daha da gücləndirib”, – analitik bildirib.

Onun sözlərinə görə, Azərbaycan həqiqətən də hər zaman Ukraynanın ərazi bütövlüyü, suverenliyi, öz müqəddəratını təyinetmə hüququ və sərhədlərinin toxunulmazlığı məsələlərində onun tərəfində olub.
“Biz, həmçinin, sistemli şəkildə həm humanitar, həm də hərbi əməkdaşlıq sahəsində – xüsusən də məsləhət dəstəyi üzrə yardım alırıq. Keçid dövrünün müharibələrində – istər Rusiya-Ukrayna müharibəsi, istərsə də Qarabağın işğaldan azad edilməsi – PUA-lardan ilk dəfə Azərbaycan ordusu uğurla istifadə etdi. 2020-ci ildə döyüş sahəsində və hərbi sahədə inqilab baş verdi. Biz həmin vaxt dronların tətbiqi təcrübəsini diqqətlə öyrəndik. Məhz bu, bizim Silahlı Qüvvələrimizin cəbhə xəttində PUA-ları bu qədər tez tətbiq etməsinə imkan verdi.

İqtisadi komponentə gəldikdə, biz artıq uzun illərdir ki, həm hökumətlər səviyyəsində, həm də sahəvi klasterlər üzrə əlaqələr qurmuşuq.

Və əlbəttə, gözləyirik ki, Azərbaycan da müharibədən sonra Ukraynanın bərpasında iştirak edəcək ölkələr sırasına daxil olacaq.

Postsovet məkanında Ukrayna ilə Azərbaycan arasında ən yaxşı və sıx münasibətlər mövcuddur. Bütün bu illər ərzində Azərbaycan öz torpaqları uğrunda mübarizə apararkən Ukrayna onu beynəlxalq qurumlarda dəstəkləyib. Və bu əməkdaşlıq mütləq davam etdirilməlidir.

Ukraynanın bərpasına, onun qlobal infrastruktur layihələrinə maraq – bu, ölkələrimizin qarşılıqlı faydalı əməkdaşlığıdır və bu əməkdaşlıq ancaq alqışlanmalıdır.

Sizin ölkənizin tarixi 5000 ildən çoxdur, Respublika isə yaxın günlərdə 107 illiyini qeyd edəcək. Bununla əlaqədar sizin medianızın bütün oxucularını ayrıca təbrik etmək istəyirəm”, – deyə Starikov fikrini tamamlayıb.