Bakı şəhəri, Səbail rayonu, Xanlar küçəsi 55/57 ünvanlarında yaşayan sakinlər "MAHAL" MTK-nın pilot layihəsi fırıldağına etiraz əlaməti olaraq Nazirlər Kabinetinin qarşısında aksiya keçiriblər. Belə ki, adı çəkilən bu tikinti şirkəti 2017-ci ilin may-iyun aylarında sakinləri yaşadıqları mənzillərindən zorla çıxarıb üzərinə lazımi öhdəliklər götürsə də, bu gün də həmin öhdəlikləri yerinə yetirmir. Yəni, həmin vaxtlarda sakinlərlə "MAHAL" MTK tikinti şirkəti arasında rəsmi qaydada müqavilə sənədləri bağlansa da, hal-hazırda bu tikinti şirkətinə rəhbərlik edən Elvin müəllim düşündüyü, yaxud da planlaşdırdığı addımlarını atmaqda davam edir. Bir sözlə, bu şəxs hansısa dövlət qurumunu, hansısa vəzifəli şəxsi saya salmır.
GundemXeber.Az-ın əldə etdiyi məlumatlara görə, "MAHAL" MTK-ya rəhbərlik edən bu şəxs hər sakinə bir cür "yağlı vəd"ini verir, amma bir kimsənin problemini həll etmir. Belə bir səbəblərdəndir ki, bu gün sakinlər haqq səslərini daha yuxarı instansiyalara çatdırmaq üçün, məhz belə bir addımlarını atmağa məcbur olurlar. O halda sual oluna bilər ki, görəsən bu MTK-nın rəhbərliyinə bir kimsə "DUR" deyəcək, yoxsa? ... Söylənilənlərə görə bu şəxs orda-burda danışıb ki, "mənə daha yuxarı instansiyada vəzifə sahibi olan şəxs arxa-dayaq durur. Ona görə də sakinlər nə qədər etiraz etsələr də, aksiya keçirsələr də, nəyəsə nail ola bilməyəcəklər". Görəsən, bu həqiqətən də belədir? Qarşı tərəfin də mövqeyini dinləyə bilərik. Mövzuya qayıdacağıq. //GundemXeber.Az//
