Əhalinin qaz təminatında mühüm islahatların sürətləndirilməsi, bu sahədə mövcud olan problemlərin qısa zamanda həlli ilə bağlı ölkə rəhbərliyinin qarşıya qoyduğu vəzifələrin yerinə yetirilməsi "Azəriqaz" İstehsalat Birliyinin prioritet məsələlərindən sayılır.
Rövnəq Abdullayevin xeyir-duası ilə qohumu Əkbər Hacıyevin Birliyə baş direktor gətirilməsi bir tərəfdən "etibarlı adam" axtarışının bəhrəsiydisə, digər tərəfdən də yeni təyinatla ən azı bu qurumun fəaliyyətini canlandırmaq görüntüsü yaratmaq məqsədi daşıyırdı. Lakin çox çəkmədi ki, bu addım ARDNŞ prezidentinin imicinə ciddi xələl gətirən amillərdən biri kimi qiymətləndirilməyə başlandı. Artıq iyul ayında Əkbər Hacıyevin təyinatının 6 ili tamam olacaq. Lakin bu müddətdə az-çox görülən işlərin yarımçıq və yarıtmaz xarakteri özünü daha da qabarıq büruzə verməyə başlayıb. Digər tərəfdən, baş direktor "Azəriqaz" sistemində uzun illər çalışmış təcrübəli kadrların oradan uzaqlaşdırılması yolunu tutaraq əslində məsələdə ölkədə lazımsız ajiotaj yaranmasına rəvac verib. Eynən də, qaz istismarı və təminatında neqativ hallara, xüsusən də rüşvətxorluğa qarşı gərəkli və effektli addımlar atılmır. Bu fakt "Azəriqaz" rəhbərinin himayədarını çətin vəziyyətdə qoyub. Nəticə etibarı ilə gözlənilən mühüm irəliləyişin əldə edilməməsi, lüzumsuz kütləvi ixtisarlar və bununla bağlı ölkə rəhbərliyinə ünvanlanan çoxsaylı şikayətlər, həmçinin savadsız və qeyri-peşəkar kadrların işə götürülməsi kimi halların ümumiləşdirilərək təhlil edildiyi və bu barədə dövlət rəhbərliyinə geniş hesabat verildiyi məlum olub. "Azəriqaz" istehsalat birliyində çalışan və rəhbərliyin çevrəsinə yaxından bələd olan mənbəmizin bildirdiyinə görə, Əkbər Hacıyev faktiki olaraq səlahiyyətlərinin icrasından kənarlaşdırılıb. Onun işlərinin faktiki olaraq ARDNŞ-nin vitse-prezidentlərindən birinin apardığı qeyd edilir. Görünür, baş direktora bəslənilən ümidlər özünü doğrultmadığı üçün bu addım atılıb. Təbii ki, Əkbər Hacıyevin məsuliyyətinin böyük bir hissəsi elə onun himayədarının üzərindədir. Digər tərəfdən, "Azəriqaz"la bağlı ARDNŞ rəhbərliyi yol verilmiş yanlışlıqların hesabının soruşulacağından ehtiyat edir. Necə olmasa, fikir belədir ki, hər halda Əkbər Hacıyev baş direktor olaraq atdığı addımları qabaqcadan rəhbərliklə razılaşdırmamış deyil. Bu baxımdan ARDNŞ prezidentinin dövlət rəhbərliyi qarşısında ciddi problemlə üzləşəcəyi qaçılmaz olacaq. Yadınızdadırsa, hələ 2010-cu ildə ARDNŞ qaz təminatı zamanı baş verən qəza halları barədə məlumatların rayon qaz istismar sahələrindən Bakı şəhəri Qaz İstismarı İdarəsinin "Mərkəzi qəza dispetçer xidməti"nə və "Azəriqaz" İB-nə pilləli şəkildə ötürülməsinin problemlərin operativ həllini ləngidiyini əsas gətirərək Bakı şəhəri Qaz İstismarı İdarəsinin, onun yerli strukturlarında fəaliyyət göstərən müvafiq bölmələrin ləğv edilməsinə, daha çevik qurumlarla əvəzlənməsinə qərar vermişdi. Lakin ustündən xeyli müddət keçsə də, bu islahatın gətirdiyi dividendlərdən danışmaq olmur. "Bakqaz"ın ləğv edilməsi ilə əslində vəziyyət yaxşılığa doğru dəyişməyib. Belə ki, yerli qaz istismar sahələrinin özbaşınalıqları elə bir həddə çatıb ki, onlar barədə hər hansı şikayətin birbaşa "Azəriqaz"a verilməsi nəticəsiz qalır. Eyni zamanda, aldığımız məlumata görə, "Azəriqaz"ın yerlərdəki vəziyyətə nəzarət etməli olan səlahiyyəli nümayəndələri qaz istismar sahələri rəhbərlərinin təsiri altındadır. Əsasən tapşırıqla hərəkət etməyi üstün tutan bu nümayəndələr əksəriyyətini vətəndaş şikayətlərindən daha çox şəxsi maraq özünə cəlb edir. "Azəriqaz" kimi çox mühüm bir qurumun işinin tənzimlənməməsi əlbəttə, ortaya xeyli suallar qoyur. Bundan əlavə, vaxtilə "Bakqazın" balansında olmuş, sonradan isə struktur islahatları nəticəsində boş qalmış bir sıra ofislərin hərraca qoyulması xəbərləri də var. Deyilənlərin təsdiqi kimi bir müddət öncə Bakı şəhəri Qaz İstismarı İdarəsinin "Mərkəzi qəza dispetçer xidməti"nin balansında olmuş binanın ümumi vəziyyətini göstərmək olar.Apardığımız müşahidələrdən sonra məlum oldu ki, həmin binada hazırda Nəzimi rayon qaz-istismar idarəsinin 3 saylı ərazi xidmət sahəsi yerləşir. Binanın qəza vəziyyətində olması bir yana, buradakı dəhşətli mənzərələrin "Azəriqaz" imicinə açıq-aşkar xələl gətirdiyi göz qabağındadır. Apardığımız söhbətlərdən sonra buranın artıq hansısa özəl struktura satıldığı xəbərini eşitdik. Bu məsələnin "Azəriqaz" rəhbərliyinin səlahiyyət dairəsindən kənar olduğu heç kəsə sirr deyil. Odur ki, Rövnəq Abdullayevə nə üçün məhz Əkbər Hacıyev kimi yaxın adamın lazım olduğunu anlayışla qarşılayırıq. \\ GünBakı \\
