Nizami Rayon Məhkəməsində hakimiyyət nümayəndəsinə qarşı müqavimət göstərmə və ya zor tətbiq etmədə təqsirləndirilən İntiqam Xıdırovun cinayət işi üzrə məhkəmə istintaqı yekunlaşıb.

Pravda.az-ın əldə etdiyi məlumata görə, hakim Emin Axundovun sədrliyi ilə keçirilən prosesdə hökm oxunub.

Məhkəmənin hökmü ilə o, 3 il müddətinə azadlığın məhdudlaşdırılması (elektron qolbaq) cəzasına məhkum edilib.

İttihama görə, hadisə 2026-cı ilin yanvar ayında paytaxtın Nizami rayonu, Keşlə qəsəbəsində baş verib.

Belə ki, İntiqam Xıdırovun yaşadığı evin yerləşdiyi ərazi üzrə “Azəriqaz” İstehsalat Birliyinin Bakı Regional Qaz İstismarı İdarəsinin Nizami rayonu üzrə Sayğac əməliyyatları xidmətində qaz avadanlıqlarının istismarı və təmiri üzrə çilingər vəzifəsində çalışan zərərçəkmiş Müzəffər Müzəffərov istehlakçıların qaz sayğaclarının göstəricilərini qeydiyyata almaq və müvafiq məlumatları aidiyyəti üzrə təqdim etmək səlahiyyətinə malik olub.

Bundan başqa, müəyyən edilmiş müddətdə istifadə olunan qazın dəyəri ödənilmədikdə istehlakçının qaz təminatının dayandırılması və ödənişdən sonra bərpa edilməsi də onun xidməti vəzifələrinə daxil olub.

İttihamda göstərilib ki, İntiqam Xıdırovun yaşadığı ev üzrə 267 manat 32 qəpik qaz borcu hesablanıb. Bu borcun hesablanmasından narazı qalan təqsirləndirilən şəxs 2026-cı il tarixdə Müzəffər Müzəffərova telefonla zəng edib və yaranmış borcla bağlı izahat tələb edib.

Sonra o, məsələni aydınlaşdırmaq üçün “Azəriqaz” əməkdaşını yaşadığı evə çağırıb. Zərərçəkmiş şəxs həmin gün saat 17 radələrində İntiqam Xıdırovun evinin qarşısına gəlib. Burada qaz borcunun hesablanması ilə bağlı söhbət zamanı tərəflər arasında mübahisə yaranıb.

İntiqam Xıdırov hakimiyyət nümayəndəsi kimi xidməti vəzifələrini yerinə yetirən Müzəffər Müzəffərova qarşı fiziki zor tətbiq edib. O, əvvəlcə sağ əli ilə zərərçəkmiş şəxsin sifət nahiyəsinə bir dəfə yumruqla zərbə vurub. Daha sonra fənd işlədərək onu yerə yıxıb və baş nahiyəsinə çoxsaylı yumruq, təpik və sillə zərbələri endirib. Nəticədə Müzəffər Müzəffərovun baş nahiyəsində xəsarətlər yaranıb.

Bu əməllərinə görə İntiqam Xıdırov Cinayət Məcəlləsinin 315-ci (Hakimiyyət nümayəndəsinə qarşı müqavimət göstərmə və ya zor tətbiq etmə) maddəsi ilə nəzərdə tutulan cinayət əməlini törətməkdə ittiham olunub.

Məhkəmə istintaqı zamanı dindirilən İntiqam Xıdırov elan olunmuş ittiham üzrə özünü təqsirli bilib. O, ifadəsində deyib ki, 2024-cü ildən etibarən onların qazı kəsilib. Bununla bağlı məhkəməyə müraciət etdiklərini və məhkəmənin yaranmış təxminən 700 manat borcun hissə-hissə ödənilməsi şərtilə qazdan istifadəyə icazə verilməsi barədə qərar qəbul etdiyini deyib.

Lakin İntiqam Xıdırovun sözlərinə görə, bundan sonra qaz təsərrüfatının əməkdaşları yenidən evlərinə gələrək qaz təminatını dayandırıblar. Bundan sonra qonşusu olan əmisi oğlunun istifadə etdiyi qaz xəttindən öz evlərinə xətt çəkərək istifadə etməyə başlayıblar. Daha sonra yenidən təxminən 300 manat borc yarandığını və qazlarının xəbərdarlıq edilmədən kəsildiyini deyib.

Təqsirləndirilən şəxs ifadəsində zərərçəkmiş şəxsə zəng edərək yaranmış borcun səbəbini soruşduğunu və məsələni aydınlaşdırmaq üçün onun evə gəlməsini istədiyini söyləyib. Müzəffər Müzəffərov gəlib borcu izah etdiyi zaman atası da onların yanına gəlib. O, atasının şəkər xəstəsi olduğunu deyərək, sonuncu ilə zərərçəkmiş şəxs arasında mübahisə yarandığını bildirib. Müzəffər Müzəffərov atasını vurmaq istəyib və buna görə o, müdaxilə edərək zərərçəkmiş şəxsə yumruqla zərbəsi endirdiyini qeyd edib.

İntiqam Xıdırov hazırda Müzəffər Müzəffərovla barışdığını, zərərçəkmişin ondan şikayətinin olmadığını bildirib. O, törətdiyi əməldən peşman olduğunu deyərək məhkəmədən barəsində daha yüngül cəza təyin edilməsini xahiş edib.