“Ermənistan və Azərbaycan hazırda nəqliyyat əlaqələrinin açılmasının təfərrüatlarını, o cümlədən marşrutların qarşılıqlı istifadə şərtlərini müzakirə edirlər”.
“Cebheinfo.az” xəbər verir ki, bunu hakim “Mülki Müqavilə” Partiyasından olan millət vəkili və Parlamentin Xarici Əlaqələr Komitəsinin sədri vəzifəsinə namizəd Sarkis Xandanyan bildirib.
Məsələni Ermənistan fraksiyasının rəhbəri Anna Qriqoryan qaldırıb. O, parlamentin iclasında Ermənistanın Azərbaycandakı hansı yollardan istifadə edə biləcəyi ilə maraqlanıb. Deputat Azərbaycanın TRIPP marşrutundan istifadəsi halında Ermənistanın hansı yollardan istifadə edə biləcəyini soruşub.
Xandanyan suala cavab olaraq bildirib ki, qarşılıqlılıq prinsipi ilə bağlı məsələlər hələ də müzakirə olunur: “Bunlar xüsusən də gömrük rüsumları və digər ödənişlərlə bağlı ola bilər. Ermənistan və Azərbaycan bu məsələlərin müzakirəsini layihənin icrası mərhələsində, nəqliyyat əlaqələri başlayanda yekunlaşdıracaqlar".
Xatırladaq ki, TRIPP (Beynəlxalq Sülh və Rifah üçün Tramp Marşrutu) layihəsi Zəngəzur vilayətindən keçən strateji tranzit dəhlizinin yaradılmasını nəzərdə tutur.
Layihəyə əsasən, Ermənistan ABŞ-yə Azərbaycanın digər bölgələrinin Naxçıvanla quru əlaqəsi quracağı marşrutu inkişaf etdirmək üçün 99 ilə qədər eksklüziv hüquqlar verəcək. Bunun üçün əksər payı ABŞ-yə məxsus olan şirkətin yaradılması nəzərdə tutulur.
Birinci mərhələdə ABŞ-yə 74%, Ermənistana isə 26% pay təklif olunur. Müqavilənin yenilənməsi ilə Ermənistanın payının 49%-ə çatdırılması ehtimalı var.
