Nizami Rayon Məhkəməsində qəsdən sağlamlığa yüngül zərər vurmada təqsirləndirilən Nağı Maqsudovun (adı, soyadı şərtidir) cinayət işi üzrə məhkəmə istintaqı yekunlaşıb.
Pravda.az-ın əldə etdiyi məlumata görə, hakim Emin Axundovun sədrliyi ilə keçirilən prosesdə hökm oxunub.
Məhkəmənin hökmü ilə o, cinayət məsuliyyətindən azad edilib və barəsində olan məhkəməyədək sadələşdirilmiş materialın icraatına xitam verilib.
İttihama görə, hadisə 2026-cı ilin yanvar ayında gecə saat 01:10 radələrində Bakı şəhərinin Nizami rayonu ərazisində baş verib.
Belə ki, Nağı Maqsudov sevgi münasibətində olduğu zərərçəkmiş Rəfiqə Nəbizadə (adı, soyadı şərtidir) ilə birlikdə olarkən qadının evə gec gəlməsi səbəbindən ona irad bildirib. Tərəflər arasında yaranmış narazılıq qısa müddətdə mübahisəyə çevrilib. Mübahisə zamanı zərərçəkmiş şəxsin təqsirləndirilən şəxsin ünvanına nalayiq ifadələr işlətməsi tərəflər arasındakı gərginliyi daha da artırıb.
İstintaqın müəyyən etdiyi hallara görə, Nağı həmin ifadələrə görə Rəfiqədən qisas almaq niyyəti ilə ona qarşı zor tətbiq edib. Belə ki, o, qadının baş nahiyəsinə yumruqla zərbə endirib.
Hadisə nəticəsində zərərçəkmiş şəxs müxtəlif bədən xəsarətləri alıb. Məhkəmə-tibbi ekspertizasının rəyinə əsasən, onda başın ənsə nahiyəsinin hematoması ilə müşayiət olunan xəsarət müəyyən edilib. Həmin xəsarət sağlamlığın qısa müddətə pozulmasına səbəb olan və sağlamlığa yüngül zərər vurma kimi qiymətləndirilib.
Toplanmış sübutlar əsasında Nağı Maqsudovun əməli Cinayət Məcəlləsinin 128-ci maddəsi ilə, yəni qəsdən sağlamlığa yüngül zərər vurma cinayəti kimi tövsif olunub.
Məhkəmə iclasında Rəfiqə Nəbizadə yazılı ərizə ilə çıxış edərək təqsirləndirilən şəxslə barışdığını bildirib. O qeyd edib ki, tərəflər arasında yaranmış narazılıq aradan qalxıb və Nağıya qarşı hər hansı şikayəti, tələbi və ya iddiası qalmayıb.
Zərərçəkmiş şəxs ərizəsində təqsirləndirilən şəxsin barəsində cinayət təqibinin davam etdirilməsini istəmədiyini vurğulayaraq, məhkəməyədək sadələşdirilmiş icraat üzrə cinayət təqibinə xitam verilməsini məhkəmədən xahiş edib.
