“Fevral ayında Flora xanım başı gicəlləndiyi üçün yıxılıb çiyin sümüyünü sındırmışdı. Sınan yer hələ də sağalmayıb. Həkimlər əməliyyat etmədilər, bildirdilər ki, yaşı çoxdur, ürəyi tab gətirə bilməz. Problem hələ də qalıb. Qolunu qaldıran kimi çiyini ağrıyır. Yaşı çoxdur deyə sümüklər gec bitişir”.

Bunu Musavat.com-a açıqlamasında Xalq artisti Flora Kərimovanın köməkçisi Yaqut İmanova deyib.

O bildirib ki, 85 yaşlı müğənninin səhhəti əvvəlki dövrlərlə müqayisədə nisbətən yaxşıdır:

“Dörd aydır ki, bağa köçmüşük. Həkimlər məsləhət görüb açıq havada gəzsin ki, ayaqları tutulmasın. Yaş öz sözünü deyir. Həkimlər deyir ki, sümükləri bir il ərzində bitişəcək. Bütün günü bağda olur. Quşların səsi onu valeh edir. Ağaclarımız da meyvə gətirir. Yaxın günlərdə Zümrüd də gələcək deyə Flora xanım çox sevinir”.

Yaqut İmanova Xalq artistinin gündəlik qrafikini də açıqlayıb:

“Səhər yuxudan duran kimi birlikdə bağı gəzirik. Sonra süfrə açıram, səhər yeməyi hazırlayıram. Daha sonra yenə bağda gəzir və yorulanda internetə girir, xəbərləri oxuyur. Televizora isə ümumiyyətlə, baxmır. Günorta yeməyindən sonra yenə də sosial şəbəkələrdə olur”.