2020-ci ildən davam edən qlobal bahalaşma nəticəsində 28 ölkədə mənzillərin qiyməti 50 faizdən çox artıb.

Reyting.az xəbər verir ki, 2026-cı il üzrə “Qlobal Yaşayış Dəyəri İndeksi” ilə bağlı hesabatda müxtəlif ölkələrin gündəlik xərcləri ABŞ-nın Nyu-York şəhərinin göstəricisi (100 bal) ilə müqayisə olunub. Yeni indeksə əsasən, bir çox regionlarda inflyasiya zəifləsə də, yüksək yaşayış dəyəri qlobal problem olaraq qalmaqdadır.

Hesabatda qeyd olunur ki, Meksika, Almaniya, Malayziya və digər ölkələrdə ərzaq xərclərinin kəskin bahalaşması ev təsərrüfatlarının büdcəsinə ciddi təsir göstərib.

Dünyada ən yüksək yaşayış dəyəri Bermud adalarında qeydə alınıb. ABŞ-nın Vircin adaları, Cersi və Kayman adaları bahalı ilk onluqda yer alıb. Bir çoxları tərəfindən “neytral cənnət” adlandırılan İsveçrə ümumi reytinqdə üçüncü pillədə qərarlaşıb və Sürix ilk dəfə 2026-cı il üçün dünyanın ən bahalı şəhəri seçilib.

Sinqapur Asiyanın ən bahalı şəhəri olmaqla yanaşı, qlobal siyahıda da mövqeyini yüksəldib. Bu göstəricilərə əsasən, Sinqapur dünyanın ən bahalı ölkələri sırasında beşinci yerdə qərarlaşıb.

Siyahıda yer alan Rusiya Federasiyası isə 25,7 indeks göstəricisi ilə 104-cü pillədə qərar tutub.