Xalq artisti Faiq Ağayev hazırda Amerikada yaşayan müğənni Elariz Məmmədoğlu ilə bağlı paylaşım edib.
Moderator.az xəbər verir ki, paylaşımda Elarizin onlarla azyaşlı qızın istismar edildiyi şəbəkə ilə bağlı ittiham olunan milyarder Ceffri Epşteynə yazdığı elektron məktub yer alıb. Məktub 2011-ci ilə aid olub.
F.Ağayev paylaşıma "Salam Elariz. Sənin ağlını sevirəm" sözlərini yazıb.
Bu məktubun isə gerçək və ya süni intellektlə düzəldiyi bilinmir. Gündəmə gələn mövzunun həqiqət olduğunu öyrənmək üçün Elariz Məmmədoğlu ilə əlaqə saxladıq.
Moderator.az-a verdiyi açıqlamada müğənni həmkarının paylaşımından xəbərsiz olduğunu bildirib:
“Faiq Ağayev mənim haqqımda belə şeylər yazmaz. Sözün düzü öncə inanmadım, elə bildim ki, hansısa sayt rəhbərinin uydurmasıdır, sensassiya xarakteri daşıyır. Öz-özümə düşündüm ki, o heç vaxt belə səviyyəsizliyə enməz. Sonra gördüm ki, səhifəsində paylaşıb. Mən heç kimə məktub yazmamışam. Məktub yazanam?! Maraqlıdır, onun mənimlə nə işi?! Yəqin məktub feykdir. Süni intellektlə düzəldilən bir məktubdur”.
Faiq Ağayevlə münasibətinin gözəl olduğunu bildirən müğənni həmkarının onunla zarafat etdiyini bildirib:
“Biz dost deyilik, amma münasibətimiz çox yaxşıdır. Onunla bağlı heç bir inciklik və küsülülük yoxdur. Hətta biz Astaraya dövlət tədbirinə gedəndə, onunla birlikdə atasının məzarını da ziyarət etmişik. Görünür gündəmdə olan hansısa mövzuya Faiq Ağayev zarafatla yanaşıb”, - deyə müğənni bildirib.
Xatırladaq ki, Ceffri Epşteyn cinsi istismar, pedofiliya və fahişəlik şəbəkəsi yaratmaq ittihamları ilə həbs olunmuş və daha sonra həbsxanada ölü tapılmışdı.
