"Avropa İttifaqı AXCP sədri Əli Kərimlinin həbsi ilə bağlı Azərbaycan tərəfi ilə əlaqə saxlayacaq".
“Cebheinfo.az”-ın məlumatına görə, Aİ-nın xarici işlər və təhlükəsizlik siyasəti üzrə sözçüsü Anita Hipper “Azadlıq” radiosuna açıqlamasında belə deyib.
“Biz Azərbaycanın Avropa İnsan Hüquqları Konvensiyası da daxil olmaqla, müvafiq beynəlxalq öhdəliklərinə əməl etməsini gözləyirik. Təqsirləndirilən şəxslərə müstəqil hüquqi yardım və adekvat səhiyyə xidməti göstərilməlidir”, - açıqlamada belə deyilir.
Xanım Hipperin açıqlaması göstərir ki, beynəlxalq təşkilatların, Qərb dövlətlərinin Əli Kərimlinin müdafiəsinə qalxacağı barədə iddiaların heç bir əsası yoxdur. Avropa İttifaqı rəsmisi sadəcə olaraq, təqsirləndirilən şəxslərə hüquqi yardımın göstərilməsi ilə bağlı prosedurları sadalayıb.
Azərbaycan dövləti də beynəlxalq konvensiyalarla müəyyən edilmiş prosedurları yerinə yetirib. Eyni hüquqi normativ qaydalar Azərbaycan qanunvericiliyində də öz əksini tapıb. Buna uyğun olaraq, Əli Kərimli vəkillə təmin edilib və tibbi müayinədən keçirilib.
Yəni AXCP sədrinin guya hüquqlarının pozulması barədə hay-küylü fikirlər bunu yayanların sosial şəbəkələrdəki səhifələrindən o yana getmir.
Radikallar Əli Kərimlini az qala bütün dünyanın tanıdığını iddia edir və onun həbs edilməsini az qala böyük bir siyasi hadisə kimi şişirdir. Bütün bunlar illər uzunu Əli Kərimlinin adı ətrafında aparılan süni təbliğatın, yaradılmış mifin nəticəsidir.
Ancaq Anita Hipperin məsələyə münasibəti nə Avropa İttifaqının, nə ABŞ-nin Əli Kərimli adlı bir probleminin olduğunu təsdiq edir.
O, digər məhbuslar kimi, sıravi bir vətəndaş statusu daşıyır və xüsusi siyasi imtiyaza malik olması barədə deyilənlərin elə Əli Kərimlinin özü tərəfindən ortaya atılmış blef olduğu aşkara çıxdı.
Əli Kərimlinin istintaqı prosesində Azərbaycan dövləti lazım olan bütün hüquq prosedurları təmin edib.
Anita Hipper də öz açıqlamasında bu məsələnin Azərbaycanın daxili işi olduğuna, Avropa İttifaqının müdaxiləsinə ehtiyac qalmadığına işarə edib.
