Dekabrın 14-də Azərbaycan Xalq Partiyasının (AXP) qurultayı keçiriləcək. Partiyanın qurucusu, sabiq baş nazir Pənah Hüseyn sədrliyə namizəd olmayacağını açıqlayıb. Pənah Hüseyn AXP-nin qurultayında hazırda partiyanın səlahiyyətlərini icra edən Qiyas Sadıqova dəstək verəcəyini bildirib: "Namizədlər olacaq, amma mənim namizədim, müavinim Qiyas Sadıqovdur".

Onun sözlərinə görə, qurultay nümayəndəsi olan və ya olmayan hər bir partiya üzvü namizədliyini irəli sürə bilər. Qeyd edək ki, Pənah Hüseyn 1999-cu ildə təsis edilmiş Azərbaycan Xalq Partiyasının sədridir. Bu il iyun ayının 16-da partiya sədrinin səlahiyyətlərinin icrasını müavini Qiyas Sadıqova həvalə edib.

AXP sədrinin səlahiyyətlərini icra edən Qiyas Sadıqov Sherg.az-a açıqlamasında deyib ki, o, partiyanın təsisçilərindən biridir. Q.Sadıqov vurğulayıb ki, Pənah Hüseyn şərəf və ləyaqətlə partiyaya rəhbərlik edib:

"Mən Pənah bəyin yenə də partiyaya rəhbərlik etməsini istərdim. Partiya zaman-zaman uğurlar qazanıb. Azərbaycan siyasi arenasında öz mövqeyi və sözü olan partiyaya çevrilib. Buna görə Pənah bəyə minnətdarıq. Əgər Pənah bəy öz namizədliyini verməsə, o zaman mən namizədliyimi irəli surəcəm. Məni dəstəklədiyi uçün Pənah bəyə təşəkkür edirəm. Təbii ki, son sözü qurultay numayəndələri deyəcək".

Qiyas Sadıqov AXP-nin qurultaya hazır olduğunu söyləyib:

"Qurultaya hazırlıq üzrə Təşkilat Komitəsinin iclasında bildirildi ki, qurultayla bağlı bütün məsələlər öz həllini tapıb. Arzu edirəm, növbəti qurultay Xalq Partiyasının üzvləri, xalqımız və dövlətimiz uçun xeyirli-uğurlu olsun".