Milli Məclisdə "Tibbi sığorta haqqında" Qanuna təklif olunan dəyişikliyə əsasən, qeyri-formal məşğul şəxslər, yəni işsizlər növbəti ildən tibbi sığortadan yararlanmaq üçün aylıq 16 manat ödəməli olacaqlar. Həmçinin qeyd olunur ki, bu məbləği vaxtında ödəməyənlərə 10 faiz miqdarında cərimə tətbiq ediləcək.

Mövzu ilə bağlı Redaktor.az-a açıqlama verən hüquqşünas Sahib Məmmədov bildirdi ki, hal-hazırda çoxsaylı insanlar var ki, özüməşğuldurlar:

"Tutaq ki, sənətkarlıqla məşğuldurlar, hansısa təmir işlərini həyata keçirirlər və ya müxtəlif xidmətlər göstərirlər. Məsələn, təmir-tikinti briqadaları qeyri-formal şəkildə ev təmiri edir, fərdi evlər tikirlər və sair. Faktiki olaraq qazanc əldə edirlər, amma sığorta ödənişləri etmirlər. Onlar muzdlu əməyə cəlb olunmayıblar, VÖEN-ləri yoxdur, vergi uçotunda da deyillər. Bu kateqoriya həmin şəxslər üçün nəzərdə tutulub.

Amma açığı, onların necə müəyyən ediləcəyi bir qədər qeyri-müəyyəndir. Yəni kimsə işsiz kimi uçota durmayıbsa və iş axtaran şəxs qismində müraciət etməyibsə, həmin şəxslərin qeyri-formal məşğul kimi avtomatik qeydiyyata alınacağı ehtimal olunur. Mən belə düşünürəm. O halda, doğrudan da işi olmayan insanlar gedib işsiz kimi qeydiyyata düşməlidirlər. Hər halda, bunun necə və hansı qaydada həyata keçiriləcəyi hələ məlum deyil. Söhbət ondan gedir ki, həmin şəxslərin qazancı var, lakin nə fərdi sahibkar kimi vergi uçotunda dururlar, nə də muzdla işləyirlər, yəni konkret əmək müqavilələri yoxdur. Bu mexanizm də məhz həmin şəxsləri əhatə edir".