25 noyabr Kəlbəcər Şəhəri Günüdür.

Bu gün rayonun Ermənistan silahlı birləşmələri tərəfindən işğaldan azad edilməsinin 5 ili tamam olur. Prezident İlham Əliyevin 31 iyul 2023-cü il tarixli sərəncamına əsasən, hər il noyabrın 25-i Kəlbəcər Şəhəri Günü kimi təntənəli şəkildə qeyd edilir.

Kəlbəcərin azad olunması Silahlı Qüvvələrin Müzəffər Ali Baş Komandanı, Prezident İlham Əliyevin siyasi iradəsi, sərkərdəlik məharəti və Azərbaycan Ordusunun Vətən müharibəsində həyata keçirdiyi uğurlu hərbi əməliyyatların nəticəsində mümkün oldu.

“Cebheinfo.az”-a açıqlamasında AĞ Partiyanın başqanı Tural Abbaslı bildirib ki, 44 günlük müharibə başlayanda, ermənilər Azərbaycan Ordusunun, Azərbaycan dövlətinin və xalqının gücünü tam bilmirdilər. O qeyd edib ki, ermənilərin yaddaşında hələ də 90-cı illərin əvvəllərindəki xaotik vəziyyət, ordudakı daxili problemlər, siyasi qarşıdurmalar, həmrəyliyin olmaması və qonşu dövlətlərlə gərgin münasibətlər qalırdı:

“Ermənilər hələ də o əhval-ruhiyyədə idilər ki, Azərbaycan Ordusunun əks-hücumunu 10 günə dəf edəcək və hətta yeni torpaqlar belə ələ keçirə biləcəklər. Amma müharibənin ilk 10 günlüyündən etibarən anladılar ki, Azərbaycan Ordusu artıq həmin ordu deyil, Azərbaycan xalqı həmin xalq deyil, Azərbaycan dövləti həmin dövlət deyil. Regionda güclü bir dövlət formalaşıb və ermənilər bu dövlətlə üz-üzə qalıblar”.

Tural Abbaslının sözlərinə görə, Ermənistan rəhbərliyi və bir sıra hərbi dairələr eyforik və xəyalpərəst mövqe nümayiş etdirərək vuruşmağa çalışsa da, ordumuzun qətiyyəti, hərbçlərin fədakarlığı düşmənə real vəziyyəti göstərdi:

“Düzdür, bəzi ermənilər eyforik və xəyalpərəst düşüncələrlə vuruşmağa davam etmək istəyirdi. Amma əsgərlərimizin qətiyyəti, şəhidlərimizin fədakarlığı və ölümün gözünə dik baxması ermənilərə reallığı göstərdi. Paşinyan indi sülhdən danışsa da, sona qədər dirənməyə çalışdı.

Bütün resurslarını səfərbər etdi, hətta Azərbaycanın mülki obyektlərini, dinc şəhərlərini və dinc sakinlərini hədəfə almaqdan belə çəkinmədi ki, xalq arasında xof, qorxu yaratsın. Lakin Azərbaycan xalqının qəlbində bir an belə qorxu olmadı. Əksinə, xalqın yeganə qorxusu müharibənin yarımçıq dayanması, Qarabağın tam azad edilməməsi idi.

44 günün tamamında, artıq Şuşa azad edildikdən sonra ermənilər gördülər ki, minlərlə hərbçiləri mühasirəyə düşüb. Anladılar ki, əgər Azərbaycan qarşısında diz çökməsələr, razılaşma imzalanmasa, minlərlə əsgərləri məhv olacaq və Ermənistan faktiki olaraq ordusuz qalacaq. Məhz həmin qorxu ilə kapitulyasiyanı imzaladılar. Bu razılaşma nəticəsində 3 rayonumuzun bir şəhid vermədən geri qaytarılması təmin olundu”.

AĞ Partiyanın başqanı, Ermənistanın revanşist cəhdlərinin gələcəkdə mümkün ola biləcəyini qeyd edib:

“Əgər beynəlxalq qüvvələr, məsələn, Rusiya, Fransa və yeri gəlsə, ABŞ kimi altdan-altdan Ermənistanı dəstəkləyən güclər olmasaydı, Azərbaycan Ordusunun yaratdığı xof kifayət idi ki, biz Zəngəzuru da döyüşsüz, çox rahatlıqla geri alaq. Təəssüf ki, buna imkan vermədilər.

Amma biz bununla arxayınlaşmamalıyıq. Ermənilər o qorxu canlarından çıxana qədər sakit oturacaqlar. Qorxu çıxandan sonra yenidən revanşist müharibəyə başlamağa çalışacaqlar. Ona görə elə etməliyik ki, sona qədər ermənilərin qəlbində Azərbaycan qorxusu, Azərbaycan Ordusunun xofu qalsın. Məşhur deyimdə deyildiyi kimi: “Sülh istəyirsənsə, müharibəyə hazır ol”.