Gələn ilin yanvarın 1-dən icbari tibbi sığorta ilə bağlı yeni qaydalar tətbiq olunacaq.

Bu dəyişikliklərə görə, artıq işsiz və qeyri-rəsmi çalışan insanların sığorta haqqını dövlət deyil, özləri ödəməli olacaq. Bu isə maddi durumu zəif olan bir çox vətəndaş üçün əlavə xərc deməkdir.

Dövlət xəstəxanalarında çalışan həkimlərin vəziyyəti də dəyişiklikdən təsirlənə bilər. İndiyə qədər sığorta ilə vətəndaş qəbul edən həkimlərin gündəlik 20 nəfərlik qəbul limiti vardı və bu limitə görə onlar az da olsa, gəlir əldə edirdi.

Yeni qaydalar tətbiq olunandan sonra bu limitin necə dəyişəcəyi və ya həkimlərin həmin əlavə gəliri alıb-almayacağı hələ də məlum deyil.Bu qeyri-müəyyənlik səbəbindən bir çox həkimin özəl xəstəxanalara keçməsi ehtimalı artır. Əgər belə olarsa, dövlət xəstəxanalarında həkim çatışmazlığı yarana bilər.

Bu dəyişikliklər dövlət tibb müəssisələrində çalışan həkimlərin sayına və tibbi xidmətin keyfiyyətinə necə təsir göstərəcək?

Mövzu ilə bağlı tibb elmləri doktoru, professor Adil Qeybulla "Cebheinfo.az"-a bildirib ki, icbari tibbi sığortaya ayrılan vəsaitlərin azaldılmas ilə yanaşı, bir neçə dəyişiklik edilməlidir ki, icbari tibbi sığortanı qərb standartlarına uyğun tətbiq etməyə imkan yaransın:

“Birincisi, elektron növbə sistemi (randevu) uzun növbələrin qarşısını almaq, keyfiyyətli tibbi xidmət təmin etmək və xəstələrin məmnunluğunu yaratmaq üçün çox vacibdir.

İkincisi, həmin vəsaitin ilk növbədə doğuş və təxirəsalınmaz yardımın əhatəsini təmin etməliyik, geri qalan hissəni isə planlı şəkildə digər əməliyyatlara dövlət və vətəndaş arasında bölmək mümkündür.

Bunun üçün biz bir neçə il öncəki həm əməliyyat, həm digər göstəricilər əsasında praqnozik xərclərin proqnozunu tutmalıyıq”.

O qeyd edib ki, vacib məsələlərdən biri də icbari tibbi sığortaya vətəndaşların cəlb olunması mexanizmidir:

“Ümumiyyətlə, bütün dünyada işsizləri dövlət maliyyələşdirir, amma bizdə bu mexanizm yoxdur. Düşünürəm ki, işsizlər üçün vəsaiti dövlət maliyyələşdirməlidir, yoxsa onlar vəsaiti hardan alacaqlar? Bu məsələ bir qədər açıq qalır.

Həkimlərin də sabit maaşı olmalıdır, onların özəl xəstəxanalara axınını azaltmaq üçün dövlət xəstəxanalarında stabil maaş sistemi təmin edilməlidir. Biz də gec-tez bu sistemə keçməliyik.

Necə ki, Almaniya, Türkiyə və digər xarici ölkələrdə olduğu kimi, sabit maaş sistemi olmalıdır. Bu stabil maaş sistemi həkimin ixtisasından, təcrübəsindən asılı olaraq dəyişir. Dünyada bu mexanizmlər artıq qurulub və tətbiq olunur”.