Milli Məclisin noyabrın 19-da keçirilən plenar iclasında "2026-cı il dövlət büdcəsi haqqında" qanun layihəsinin I oxunuşa dair müzakirələrdə açıqlamasına görə tənqid edilənlərdən biri iqtisadiyyat naziri Mikayıl Cabbarov olub. Nazirin “2019-cu il yanvarın 1-dən 2025-ci il noyabrın 1-dək orta təqvim günləri hesabı ilə qeyri-neft-qaz özəl sektorda 200-ə yaxın yeni iş yerinin yaradılması qeydə alınıb” açıqlaması ictimaiyyəti narazı salıb. Bu rəqəmin real olmadığı, ölkədə kütləvi ixtisarlar getdiyi bildirilib.

Hüquq müdafiəçisi Mirvari Qəhrəmanlı da Pravda.az-a açıqlamasında Mikayıl Cabbarovu sərt tənqid edib.

“Mikayıl Cabbarovun o qədər vəzifəsi var ki, yəqin, bəzən rəqəmləri dəqiqləşdirməkdə çətinlik çəkir. İş yerləri ilə əlaqədar açıqlamasına ən çox əsəbləşənlərdən biri mən oldum. Bilirsiniz ki, ölkənin hasilat sənayesində kütləvi ixtisarlar gedir, ancaq bunu "yenidənqurma", "sağlamlaşdırma", "optimallaşdırma" adlandırırlar. Nəticə isə xeyli sayda insanın hüquqları pozulur. Hətta bunu "psixoloji terror" adlandırıram. Çünki yaşlı insanları xəcalət qarşısında qoyur - ya təqaüd yaşına çatanda işdən get, ya da imtahan ver. Soruşdum, bir nəfər dedi ki, imtahan məni narahat etmir, sadəcə, mənə qarşı olan hörmətsizlik, balaca uşaqlar kimi işdən qovmaları narahat edir. Azərbaycan Dövlət Neft Şirkətində (SOCAR) biabırçı şəkildə işsizlərin sayı artır. Bunun məsələyə dəxli var, çünki Mikayıl müəllim SOCAR-ın Müşahidə Şurasının sədridir. Yəni sayı iyirmiyə qədər olan vəzifələrindən biri budur, mən də deyənlərin yalançısıyam. Bütün idarəetmə, demək olar, nəzarətdədir. Buna görə də hasilat aşağı düşüb. Düşünürəm, hər gün 200 iş yerinin açılması rəqəmini kimsə qəsdən verib ki, Mikayıl Cabbarovu pis vəziyyətdə qoysun. O da düşünüb ki, doğrudan da, hər gün 200 iş yeri açılır. Qarabağda gedən tikinti yerlərində müvəqqəti işçilər olur. Bir həftəlik dəvət edirlər. Onların da pullarını vaxtlı-vaxtında ödəyə bilmirlər. Çoxlu sayda etirazlar gəlir. “BP”nin podratçısı “CCİC” şirkəti Azərbaycan ərazisində kəmərin çəkilişi ilə məşğul olurdu. Hasilatın pay bölgüsü sazişlərində o vaxt belə bir öhdəlik qoyulmuşdu ki, şirkət hansı ərazidə kəmərin çəkilişi həyata keçiriləcəksə, orda mütləq yerli əhalini işlə təmin etməlidirlər. Bunlar isə qeyri-qanuni olaraq Azərbaycana Pakistandan və digər yerlərdən işçi gətirirdilər. Hesabat vermək istəyirdilər ki, guya yerli işçiləri cəlb ediblər. Halbuki müvəqqəti iş üçün qrup yaratmalı, komanda müəyyən etməli idilər. Bu, yox idi. Mikayıl müəllim də, yəqin, elə həmin variantı nəzərdə tutub. Ölkə ərazisində hazırda kütləvi ixtisarlar gedir. Nazir həqiqətən 200 iş yerini sübut edə bilər? Rəqəm göstərsin ki, filan rayonda bu qədər iş yeri açıb. Heç olmasa, rayonlarla bağlı statistika açıqlasın. Mikayıl müəllim malı mala qatıb. İxtisar etdikləri ilə yeni açılan iş yerlərinin sayını səhv salıb. Bunun bir günahı Mikayıl Cabbarovda yox, vəzifələrinin sayındadır, bir də nə yazılıbsa, ona veriləni təhlil etmədən oxumasındadır. Gülməlidir, inanmıram ki, gündəlik o qədər iş yeri açılır. Yəqin, biri yer qazıb, onu da iş yeri adlandırır. Dediyim kimi, hasilatda kütləvi ixtisarlar gedir və hasilat aşağı düşür. “Yuxarıda” xeyli sayda müavin, müşavir və digər kadr yerləri açılır. Ola bilər, beynində qalıb ki, kimisə harasa müşavir, müavin təyin ediblər. Buna görə müqayisə apardım ki, bəlkə, SOCAR-da Müşahidə Şurası ləğv olunsun, Mikayıl müəllim və onun komandası başqa işlə məşğul olsun. Ya da heç olmasa, Müşahidə Şurasının üzvlərindən biri “kaçalka” görmüş neftçi olsun, yaxud sahə üzrə dinləmələrdə nazirin özü yox, daha çox informasiyaya malik olan şöbə işçiləri iştirak etsinlər. Yenə bu çıxışların nəticəsi olaraq deyəcəklər ki, ölkədə işsizlik 5%-dir. Hasilat sənayesini elə Mikayıl Cabbarovun komandası bu günə saldı. Əvvəllər mən onu belə tanımırdım. Hasilat sənayesinə çox bələdəm. Hətta Qarabağda gedən tikintilərdə, idarə və müəssisələrdə insanların maaşlarının verilməməsi, bəzilərini əmək müqaviləsi olmadan işlətmələri - problemlər var. Qoy İqtisadiyyat Nazirliyi cəmiyyətə təqdim etsin ki, hansı sahədə neçə iş yeri açıb. Yoxsa ölkə başçısına hər dəfə "5% işsizlik var" deyir. Mən də həmin dəqiqə "əyilib", SOCAR-a baxıram ki, adam yalan danışmaz...” – hüquq müdafiəçisi deyib.