Ucuz kolbasa məhsullarının satışı ilə bağlı mediada yayılan məlumat əsasında Bakı şəhəri, Nizami rayonu, C.Naxçıvanski küçəsi, ev 49C ünvanında fəaliyyət göstərən “Kəngərli” firmasına məxsus bazarda Azərbaycan Qida Təhlükəsizliyi Agentliyinin (AQTA) əməkdaşları tərəfindən monitorinq keçirilib. Bu barədə AQTA məlumat yayıb. Məlumatda bildirilib ki, bu barədə ət məhsullarından nümunələr götürülərək mikrobioloji göstəriciləri və tərkibindəki ətin mənşəyinin yoxlanılması məqsədilə Qida Təhlükəsizliyi İnstitutunun müvafiq laboratoriyasına təqdim edilib. Sınaq nəticəsində dana əti basdırması məhsulunda at DNT-si aşkarlanıb. Bununla əlaqədar, bazarda fəaliyyət göstərən fiziki şəxs Rzayev Azad Rza oğluna məxsus anbar və satış obyektində plandankənar yoxlama keçirilib. Baxış zamanı texniki normativ hüquqi aktların tələblərinin pozulduğu məlum olub. Belə ki, obyektin qida təhlükəsizliyi qeydiyyatından keçmədən fəaliyyət göstərdiyi, qanunvericiliyin tələblərinə uyğun etiket məlumatları və müvafiq müşayiətedici sənədləri olmayan kolbasa, dana əti basdırması, çaxır, konyak və pendirlərin satışa çıxarıldığı, “Nemiroff” əmtəə nişanlı araq, konyak və çaxır məhsullarının idxal sağlamlıq aktının olmadığı, həmçinin pendir və dana əti basdırması məhsullarının soyuducudan kənarda, temperatur rejimi gözlənilmədən saxlanıldığı, dondurucu və soyuducuda mal qonşuluğu prinsipinin pozulduğu müəyyən edilib. Faktla bağlı obyekt rəhbərliyi barəsində inzibati protokol tərtib olunub, satışa çıxarılan ət məhsulu, alkoqollu içki və pendirlərdən nümunələr götürülərək müayinələrə cəlb edilib.
Azad İstehlakçılar Birliyinin sədri Eyyub Hüseynov Sherg.az-a açıqlamasında deyib ki, son aylarda ölkədə qida təhlükəsizliyi və istehlakçı hüquqları ilə bağlı narahatlıq doğuran məsələlər daha çox gündəmə gəlir. O bildirib ki, dana əti adı altında at ətindən hazırlanmış məhsulların satışa çıxarılması açıq şəkildə qanunsuzluqdur və bu, istehlakçıların aldadılması deməkdir:
“At ətinin istifadəsinə dair ölkədə konkret qadağa olmasa da, halal standartlarının tətbiqi və ənənəvi qida mədəniyyətinə uyğun olmayan ət növlərinin satışının məhdudlaşdırılması zəruridir. İnsanlar nəsillər boyu formalaşan qida vərdişlərinə uyğun məhsullar istehlak etməlidirlər, çünki bu qidaların insan orqanizminin genetik uyğunlaşmasında mühüm rolu olub. Buna görə də, ənənəvi olmayan ətlərin bazarda açıq dövriyyəsinin qanunla tənzimlənməsi məqsədəuyğun hesab edilir”.
E.Hüseynov vurğulayıb ki, qida təhlükəsizliyi və istehlakçı hüquqlarının müdafiəsi baxımından belə halların qarşısını almaq üçün ciddi nəzarət mexanizmlərinə ehtiyac var:
“İstehlakçıların aldadılmasının qarşısını almaq, şəffaflığı təmin etmək və qanun pozuntularını minimuma endirmək üçün mövcud qanunvericiliyin daha da gücləndirilməsi vacibdir”.
