Ermənistan Baş naziri Nikol Paşinyan komanda yoldaşlarına boşanmağı qadağan edib.
Bu barədə “Hraparak” qəzeti yazıb.
Nəşr iddia edib ki, Ermənistan rəhbəri ölkədə hər şeyə, o cümlədən komanda yoldaşlarının şəxsi həyatlarına da nəzarət edir:
“Əldə etdiyimiz məlumata görə, o, komanda yoldaşlarına boşanmağı qadağan edib. Bu yaxınlarda komanda yoldaşlarından biri ona belə bir qərar verdiyini, həyat yoldaşından boşanaraq yeni həyata başlamaq istədiyini bildirib. Paşinyan bunu əsas gətirərək komanda yoldaşlarına boşanmağı qadağan edib.
Baş nazir deyib ki, hakim partiyada boşanmaların limiti artıq dolub, daha heç kimin boşanmağa haqqı yoxdur. Paşinyan bunu onunla əsaslandırıb ki, belə hallar hakim komandanın üzvlərini ictimaiyyətin gözündə daha da aşağı salır”.
Politoloq Natiq Miri Sherg.az-a deyib ki, “Hraparak” qəzeti bilavasitə Nikol Paşinyan hökumətinə müxalifətdə olan və Rusiyaya bağlı media orqanıdır:
"Bütün dezinformasiya və yalan xəbərlər əsasən “Hraparak” vasitəsilə dövriyyəyə buraxılır. Bir müddət öncə həmin qəzetin yaydığı dezinformasiya nəticəsində belə bir rəy formalaşmışdı ki, guya Donald Trampın oğlu Ermənistana səfərə gələcək. Hətta bu mövzu ətrafında mediada müəyyən təhlillər və araşdırmalar da aparıldı. Lakin məsələ təkzib olunana qədər Ermənistan hökuməti bu barədə heç bir rəsmi açıqlama vermədi. Sonradan məlum oldu ki, Donald Trampın oğlunun Ermənistana səfəri ilə bağlı iddialar əsassızdır və belə bir plan mövcud olmayıb. Bu məsələyə münasibət bildirən Nikol Paşinyan qeyd etdi ki, bu xəbəri kim yaymışsa, məhz onlar da həmin suala cavab verməlidirlər. Ona görə də bu qəzetin yaydığı məlumatlara etimad etmək olmaz. Bununla belə, mənəvi-psixoloji baxımdan hakimiyyət nümayəndələrinə, xüsusilə də parlament üzvlərinə və yüksək vəzifə sahiblərinə müəyyən xəbərdarlıqların edilməsi mümkündür. Çünki hakimiyyət həm imkan, həm də məsuliyyət deməkdir. Bəzi insanlar üçün bu, maddi imkanların artması və nəticədə mənəvi dəyərlərin arxa plana keçməsi ilə müşayiət oluna bilər. Belə halların qarşısını almaq üçün edilən xəbərdarlıqlar normaldır və burada demokratiyanı pozan heç bir element görmürəm. Əgər siz siyasətdə və hakimiyyətdə bir cəbhədə silahdaşsınızsa, burada təkcə partiya nizamnaməsinə deyil, həm də mənəvi dəyərlər sisteminə sadiq qalmaq vacibdir. Əgər “Real Ermənistan”, “Legitim Ermənistan” ideyası, yəni dördüncü müstəqil Ermənistan Respublikasının qurulmasından danışırıqsa, bu prosesdə mənəvi dəyərlərin də bərpası zəruridir".
Analitik əlavə edib ki, Nikol Paşinyan hökuməti illərdir xalqı aldatmış və faciələrə sürükləmiş kilsə rəhbərliyinin riyakarlığını ifşa edib:
"Bu ifşa prosesi hələ də davam edir. Bu isə o deməkdir ki, kilsə rəhbərliyinin tam ifşa olunmasından sonra dini baxışlardan tutmuş mənəvi dəyərlərin yenilənməsinə ciddi ehtiyac var. Bu kontekstdə hakimiyyət nümayəndələri xalqa nümunə olmalı şəxslərdir. Çünki hakimiyyət hər zaman xalqın gözləri qarşısındadır və cəmiyyət də məhz onlara baxaraq dəyərləndirmə aparır. Ona görə də “Hraparak”ın irəli sürdüyü ittihamlar rəqabətə dözə biləcək səviyyədə deyil. Əksinə, əgər Nikol Paşinyan zaman-zaman bu mövzularda hakimiyyət təmsilçiləri ilə söhbətlər aparırsa, bu, onun xeyrinədir. Çünki bu, Paşinyanın dəyərlər sisteminə və mənəvi prinsiplərə verdiyi önəmi bir daha göstərir".
