Bəzi media subyektlərinin Ramiz Mehdiyev mövzusundan istifadə edərək keçmiş və indiki məmurları şantaj vasitəsinə çevirdiyi deyilir. Bildirilir ki, bu proses hədə-qorxu yolu ilə maddi qazanc əldə etməyə hesablanıb və media mühitini çirkləndirir.

Qeyd edilən media orqanları və onların rəhbərləri haqda hüquqi araşdırma aparıla bilərmi? Belə neqativ tendensiyaların qarşısı necə alınmalıdır?

Globalinfo.az-a danışan media mütəxəssisi, professor Qulu Məhərrəmli deyib ki, Ramiz Mehdiyevlə bağlı məlum xəbərlər yayılandan sonra mediada üç əsas mövqe formalaşıb:

“Birinci xəttə mənsub olanlar fürsətçi və qisasçılıq hissi ilə yaşayan şəxslərdir. Onlar hadisədən öz şəxsi maraqları üçün istifadə edir, düşmən hesab etdikləri insanlara qarşı kampaniya aparır və Ramiz Mehdiyev məsələsini bu məqsədlə alətə çevirirlər. İkinci qrup isə susqun təbəqədir. Bu insanlar məsuliyyətdən yayınmaq üçün özlərinə bəraət qazandırırlar. Üçüncü mövqe isə daha sağlam yanaşmadır. Bu xəttin tərəfdarları Ramiz Mehdiyev olayınl bəhanə etmədən, cəmiyyətdə kök salmış nöqsanları, eybəcərlikləri dilə gətirir və bununla vacib bir ibrət dərsi verirlər. Onların fikrincə, hər bir məmur anlamalıdır ki, dövlətə və cəmiyyətə zərər vuran, dəyərləri tapdalayan heç bir addım cəzasız qalmır. Zaman keçsə də, gerçəklər üzə çıxır və cəmiyyət qarşısında hesabat vermək zərurəti yaranır”.

Professor qeyd edib ki, media bu mövzunu sağlam və obyektiv platformada saxlamalıdır:

“Diskussiyalar, mübahisələr və çıxışlar düşünülmüş şəkildə aparılmalıdır. Media orqanları öz mövqelərini, yanaşma rakurslarını və məqsədlərini aydın müəyyənləşdirməlidir. Doğrudur, istintaq və əməliyyatla bağlı məhdud məlumatların olması birinci qrupda qeyd olunan şəxslərə fürsət yaradır ki, istədikləri insanları qaralasın, həqiqətə uyğun olmayan fikirlər səsləndirsinlər. Qisas hissi ilə hərəkət edənlərin belə davranışı, şübhəsiz ki, əxlaqsızlıq nümunəsidir və bu barədə açıq danışmaq lazımdır.

Mövcud nöqsanların aradan qaldırılması üçün bu kimi məsələlərə obyektiv, düşünülmüş yanaşmaq vacibdir. Media prosesi sistemli və ağıllı şəkildə idarə etməli, çıxışlara, mövqelərə diqqətlə yanaşmalıdır. Ona görə də sanballı, cəmiyyətdə nüfuzlu və söz haqqı olan şəxslərin fikirlərinə üstünlük verilməsi daha məqsədəuyğundur. Onsuz da bir insanın danışığından nə dərəcədə obyektiv və ya qərəzli olduğu dərhal hiss edilir. Buna görə də media düzgün seçim prinsipləri müəyyənləşdirməli və peşəkar məsuliyyətini qoruyaraq hərəkət etməlidir”.

Vəkil Mehman Muradlı bildirib ki, bəzi media subyektləri digər oxşar hallarda da fəallaşırlar:

“Məsələn, keçmiş MTN əməkdaşlarının həbsi dövründə bir sıra media qurumları müxtəlif məmurları əsassız şəkildə Eldar Mahmudova bağlayırdı. Bu isə açıq şəkildə maddi maraq güdən yanaşmanın nəticəsi idi. İndi də eyni üsulla “Ramiz Mehdiyev kartı”ndan istifadə edirlər. Belə hallar nə birinci, nə də sonuncudur. Hər hansı məmur onların istəyini yerinə yetirmədikdə, dərhal həmin şəxsi Mehdiyevlə əlaqələndirib müxtəlif orqanlara şikayət edirlər.

Sabiq Prezidentinin Administrasiyasının rəhbəri bir vaxtlar hakimiyyətin üçüncü nümayəndəsi kimi icra başçılarının təqdimatlarını verən şəxs rolunda çıxış edirdi. Lakin bütün məmurları onunla əlaqələndirmək əsassızdır. Dövlətin rəhbəri və qərarverici şəxs prezidentdir. Media qurumları unutmamalıdır ki, hədə-qorxu, şantaj və ya əsassız ittihamlarla tələb irəli sürmək cinayət məsuliyyəti yaradır və bunun qanunla ciddi cəzası var. Ona görə də bununla bağlı media subyektlərində hüquqi araşdırma aparılması mümkündür”.