“Son zamanlar Azərbaycanla Ermənistan arasında gedən proseslər - istər Ermənistan rəhbərliyinin verdiyi bəyanatlar, istərsə də Azərbaycan rəhbərliyinin atdığı konkret addımlar - göstərir ki, iki ölkə münasibətləri real şəkildə normallaşdırmaq üçün ciddi səylər göstərir. Xüsusilə Rusiyanın prosesdən kənarda qalması ümid verir ki, bu dinamika yaxın zamanda Azərbaycan və Ermənistan arasında real sülh müqaviləsinin imzalanmasına gətirib çıxaracaq”.

Bu fikirləri “Reytinq” qəzetinə açıqlamasında Azərbaycan Demokrat Partiyasının (ADP) sədri Sərdar Cəlaloğlu bildirib.

Partiya sədri qeyd edib ki, artıq Azərbaycan ərazisindən Ermənistana müəyyən yüklər daşınır:

“Hazırda Qazaxıstandan gətirilən yüklər Ermənistana Azərbaycan üzərindən aparılır. Gələcəkdə Rusiyadan Ermənistana göndərilən mallar da eyni marşrutla çatdırıla bilər. Yüklərin Azərbaycan ərazisindən daşınması faktiki olaraq Bakının xoş niyyətinin göstəricisidir. Azərbaycan həm də dünyaya mesaj verir ki, Ermənistanla münasibətlər normallaşacağı təqdirdə kommunikasiyalardan təzyiq vasitəsi kimi istifadə etməyəcək, əksinə, Ermənistanın da bu imkanlardan yararlanması üçün şərait yaradacaq. Düşünürəm ki, hər iki tərəfin atdığı addımlar xoş niyyətdən, dövlət rəhbərlərinin bir-birinə yaxınlaşmasından və sülhə sadiqliyindən xəbər verir”.

S. Cəlaloğlu əlavə edib ki, vətəndaş cəmiyyəti nümayəndələrinin son zamanlar həyata keçirilən qarşılıqlı səfərləri cəmiyyətlər arasında yaxınlaşmanı sürətləndirir və bu mənada xalq diplomatiyası mühüm əhəmiyyət daşıyır.

Partiya sədri ümid edir ki, yaxın gələcəkdə Azərbaycan və Ermənistanda fəaliyyət göstərən siyasi partiyalar arasında da belə görüşlər və müzakirələr keçiriləcək:

“Yəni sülh müqaviləsinə qədər hər iki ölkədə ümumi etimad mühiti formalaşmalıdır ki, müqavilə imzalandıqdan sonra müəyyən qüvvələr bu prosesi pozmağa çalışmasınlar. Bəzi dairələr demoqogiyadan istifadə edərək Ermənistan və Azərbaycan arasında münasibətləri gərginləşdirmək niyyətində ola bilərlər. Bu baxımdan, hər iki ölkənin rəhbərləri elə addımlar atmalıdırlar ki, daxildə heç kim sülh müqaviləsinin imzalanmasına etiraz etməsin. Eyni zamanda, xarici qüvvələr də bu prosesdən istifadə edərək ölkələrin daxili işlərinə qarışmaq imkanı tapmasınlar,” – deyə Sərdar Cəlaloğlu vurğulayıb.