Milli Məclisin deputatı Fazil Mustafa Azad Vətən Partiyasının sədri Akif Nağnın onun barəsində sərt ittihamlar səsləndirməsinə münasibət bildirib.

Pravda.az F.Mustafa Akif Nağını İran dövlətinin maraqlarının alovlu müdafiəçisi adlandırıb.

"Qonşu dövlətin maraqlarının alovlu müdafiəçisi kimi tanıdığım bu adamın, təxminən, hansı fikirləri səsləndirə biləcəyini proqnozlaşdırdığıma görə öncə çağırışlara diqqət yetirmədim. Söylədim ki, bütün "Qum"cuqlara cavab vermək yalnız mənim işim deyil ki? Buyurub, sizlər də cavab verin, çünki burada mənim şəxsimi hədəf almaq onun öz iradəsi ilə gerçəkləşmir ki? Bütövlükdə maskalanaraq sözdə millətçi, cəbhəçi, Qarabağın azadlığı uğrunda mübariz kimi cəmiyyətə sırınmış bu qəbildən olan insanların ifşa olunması üçün mən artıq əlimdən gələni etmişəm. Son kitabım olan "Cəhalət gülləsi, aydınlıq çiləsi" birbaşa bu mövzuya həsr edilib və orada Akif Nağı və bütün "Qumçu" şəbəkəyə qarşı apardığım mübarizənin bir çox məqamları əks olunub. Axı tarix üçün bunlar olduqca vacibdir, çünki şəxsimə qarşı məlum terror hadisəsi ilə bağlı keçirilən məhkəmə prosesi də göstərdi ki, bu şəbəkə xərçəng caynaqlarını dövlət idarəçiliyi, siyasət və həyatımızın başqa sferalarına uzada bilmişdir. Sadəcə, bir çox hallarda səfəviçilik, güney azərbaycançılıq, məzhəb təəssübkeşliyi terminlərinin arxasında gizlənməklə öz məqsədlərini gerçəkləşdirirlər. İllərdir, həyatımız, canımız bahasına bu şəbəkə ilə apardığımız mübarizənin mahiyyəti ağıllı insanlarımız tərəfindən dəqiq anlaşılır. Hər zaman söylədiyimi bir daha təkrarlayıram - müstəqil, dünyəvi, milli Azərbaycan dövləti üçün "5-ci kolon" deyilən təhlükənin bir adı var, o da "cəhalət kolonu"dur. Bunu da din, məzhəb, təriqətlər üzərindən yaradıblar və alt qatımızda cəhalət virusunu elə yerləşdiriblər ki, dünyəvi dövlətimizin acazıq zəifləyə biləcəyi anda kənardan idarə edərək hərəkətə keçirməyi hədəfləyirlər. Gerçəkdən də bu diplomlu savadsız adam başından çox-çox böyük danışıb. Əsla bunu təhqir məqsədi ilə söyləmirəm. Adam özünün yerli qəzetlərin birində çap olunan elmlə, tədqiqatla əlaqəsi olmayan, sadəcə, bir məzhəb cəfakeşi kimi özünü təqdim etdiyi sıradan bir məqaləsini “sanballı” adlandırırsa, başqa bir ifadə tapmaq olduqca çətindir. Ötə yandan onun çıxışının da ittihamdan daha çox məqsədyönlü iftira xarakteri daşıdığını bir neçə müqayisədə rahat şəkildə göstərə bilərəm. Adam söyləyir ki, Fazil Mustafa hüquqşünas kimi elmi əsər yaza bilməyib, dönüb fəlsəfi, tarixi əsərlər yazıb və disstertasiya müdafiə edib. Paho, nə qədər ağır bir ittiham! Həm də bunu bir normal elmi əsər yazmaq qabiliyyəti olmayan tarix elmləri namizədi söyləyir. Adam elə düşünüb ki, hüquq sahəsi fəlsəfədən daha çətindir, o zaman gərək hüquqi biliklərimi isbatlamaq üçün 31-ci kitabımı bu mövzuya həsr edim. Yaxud da qanun layihələri ilə bağlı Milli Məclisdə son iyirmi ildə etdiyim peşəkar hüquqşünas çıxışlarını dərs vəsaiti olaraq ağayi Akif Nağıya gərək əlavə savad alması üçün təqdim edim. Bu minvalla, bu gün kimsə böyük filosof Karl Yaspersə niyə həkim olduğu halda fəlsəfədən əsər yazmasını irad olaraq bildirməkdə haqlı sayılmalıdır. Bu cür boş-boş danışanlara həmişə bir sözüm olur: götür hər hansı kitabımın elmi tənqidini yaz! Yaxud da öz kitabını ortaya qoy ki, onun üzərindən müzakirə aparaq! Digər tərəfdən, mənim yazdığım kitablarda çox sayda mənbələr araşdırdığımı, onları bir yerə yığdığımı, lakin öz fikrimin olmadığını deyir. Ardınca da kitablarımdan qeyd etdiyi onlarla orijinal fikir və mülahizəni zərərli adlandırır. Maraqlıdır ki, bütün bu iftiralardan, Babəkə, Şah İsmayıla münasibət məsələsindən sonra dərhal əsas paxlanı ağzından çıxarır: "Bizim məzhəbimizə qarşı yazıları dövlətimizə, millətimizə qarşı düşmənçilikdən xəbər verir". Maraqlıdır ki, bu ifadələri Azərbaycanda leqal fəaliyyət göstərən bir partiya rəhbəri səsləndirir. Və o şəxsə qarşı söyləyir ki, illərdir sünnisinə, şiəsinə, nurçusuna, süleymançısına, eləcə də məzhəbçiliyin, təriqətçiliyin, etnik separatçılığın hər növünə qarşı ardıcıl mübarizə aparır, müsəlman terminindən başqa hansısa bir tanıtımın İslam dini adına səsləndirilməsinə qarşı sərt mövqe sərgiləyir. İslamın mahiyyətini hələ də dərk etməyən bu şəxslər səbəbsiz yerə məzhəb bölücülüyündən bəhs etmirlər. Bu ünsürlərin mənəvi qida aldığı mənbələr məhz bu çağırışlara görə onları dəstəkləyirlər. Dünyəvi, müstəqil, milli dövlətimizin təhlükəsizliyi üçün bu kimi ünsürlərin bütün hərəkətlərini, çıxışlarını diqqətə almaq olduqca vacibdir..." - Fazil Mustafa deyib.