Son günlər cəmiyyətdə dezinformasiyaların sürətlə yayıldığı müşahidə olunur. Sosial şəbəkələrdə tanınmış şəxslər, deputatlar və ictimaiyyət üçün tanınan digər fiqurların adından saxta açıqlamalar yayılır. Təəssüf ki, bəzi media orqanları da bu məlumatların həqiqiliyini yoxlamadan təqdim edir, nəticədə ictimaiyyət arasında çaşqınlıq və qarışıqlıq yaranır.

Bu kimi halların əsas günahkarı kimdir?

Redaktor.az-a danışan jurnalist, televiziya tənqidçisi, publisist, filologiya elmləri doktoru, Bakı Dövlət Universitetinin professoru Qulu Məhərrəmlinin fikrincə, cəmiyyətdə informasiya və media savadlılığına çox ciddi ehtiyac var:

"Hətta bəzən ən öndə olan adamlar dezinformasiyalara, süni intellektin yaratdığı qeyri-dəqiq məlumatlara istinad edir, onu yayır, ona reaksiya bildirir və s. Əlbəttə, bu işdə bizim peşəkar medianın da müəyyən günahı var. Çünki o media da həmin məlumatlara istinad edir, tirajlayır. İnformasiya ilə işləyən şəxs birinci növbədə əmin olmalıdır ki, bu informasiya dəqiqdir, mötəbərdir, onun konkret mənbəyi var. Başqa mənbələrdən də bu təsdiq olunur və belə olduğu halda həmin məlumatı yaymaq olar. Təəssüf ki, bizdə bu qaydalara əməl etmirlər. Nəticədə isə, xüsusən sosial şəbəkədə çox ciddi xaos, qarışıqlıq yaranır. Kim nəyi dedi, harda dedi, necə dedi, bu hansı məlumata reaksiyadır və s. bu yoxdur".

Professorun sözlərinə görə, bu məsələdə bizim ənənəvi media çox ciddi rol oynamalıdır:

"Məsələn, mən bir informasiya istehlakçısı kimi onlara baxıram ki, bu mənbələr dəqiqdir, yoxsa yox. Ona görə, xüsusən sosial şəbəkədə yayılan məlumatların çoxuna mənbə kimi baxırlar, ona istinad edirlər və nəticədə ciddi şəkildə qeyri-peşəkar yanaşma meydana çıxır. Bunun bircə yolu var: mənbəyi olan məlumatlara, daha çox rəsmi məlumatlara və daha çox mötəbər mənbələrə etibar eləməli, onların məlumatlarını yaymalı və onlarla işləməliyik. İkinci variant yoxdur".