“Təhlükəsizlik təmin edilmədən inkişaf mümkün deyil”.

Bu sözləri Prezident İlham Əliyev 7 oktyabr 2025-ci ildə Qəbələdə Türk Dövlətləri Təşkilatının (TDT) Dövlət Başçıları Şurasının 12-ci Zirvə Görüşündəki çıxışı zamanı deyib.

Dövlətimizin başçısı vurğulayıb ki, beynəlxalq hüququn norma və prinsiplərinin kobud şəkildə pozulduğu dövrdə ölkələrimiz arasında hərbi və hərbi-texniki sahədə əməkdaşlıq çox önəmli amillərdən biridir:

“Bu çərçivədə müttəfiqimiz olan Türkiyə ilə dərin əməkdaşlıq mövcuddur. Yalnız son bir ildə Türkiyə ilə birgə 25-dən artıq ikitərəfli və çoxmillətli hərbi təlimlər keçirilmişdir. Ölkələrimiz arasında hərbi, müdafiə və təhlükəsizlik sahələrində geniş əməkdaşlığı nəzərə alaraq, 2026-cı ildə Azərbaycanda Türk Dövlətləri Təşkilatına üzv ölkələrin birgə hərbi təlimlərinin keçirilməsini təklif edirəm”.

Qeyd edək ki, Prezident İlham Əliyevin bu unikal təklifi bütün türk dünyasında təqdir olunub. Bunun olacağı təqdirdə Türk Dövlətləri Təşkilatının daha da böyüyəcəyinə və hərbi güc kimi də formalaşacağına şübhə yoxdur. Beləliklə, dövlətimizin başçısı Türk Dövlətləri Təşkilatının inkişafında daha bir mərhələnin əsasını qoydu.

Milli Cəbhə Partiyasının (MCP) sədri, Milli Məclisin deputatı Razi Nurullayev “Cebheinfo.az”-a açıqlamasında bildirib ki, Türk Dövlətləri Təşkilatı kifayət qədər böyük bir yol keçib:

“Bu müddət ərzində siyasi, iqtisadi, sosial, humanitar və digər sahələrdə böyük inkişaf əldə olunub. Bu təşkilata daxil olan türkdilli ölkələr bir-birilə daha da yaxınlaşıblar. Artıq bu yaxınlıq bir çox birgə addımların atılmasına imkanlar yaradıb. Türk Dövlətləri Təşkilatı hazırda dünyada baş verən təlatümlər və xaos dövründə özünü müdafiə etmək üçün müəyyən addımlar atmalıdır.

Hesab edirəm ki, Prezident İlham Əliyev də məhz bundan irəli gələrək 2026-cı ildə Türk Dövlətləri Təşkilatına daxil olan ölkələrin Azərbaycanda birgə hərbi təlimlərinin keçirilməsi təklifi irəli sürülüb”.

Millət vəkili diqqətə çatdırıb ki, bu, Türk Dövlətləri Təşkilatına daxil olan ölkələrin suverenliyinin və vətəndaşlarının təhlükəsizliyinin qorunması üçün çox mühüm bir addım olacaq:

“Hazırda bütün dünyada müəyyən bir qütbləşmə prosesi başlayıb. Belə bir zamanda, hətta dünyanın yenidən bölüşüdürülməsi ilə bağlı müəyyən siqnallar var. Yəni güclülərin haqlı olduğu kimi bir reallıq yaranıb. Ona görə də bir-birinə yaxın ölkələr birgə əməkdaşlıq yolunu seçirlər.

Bu baxımdan, Türk Dövlətləri Təşkilatının birgə hərbi təlim keçirilməsi təklifinin gözəl bir təşəbbüs olduğunu düşünürəm. Cəmiyyətimizdə də hər zaman belə istək olub. Prezidentin bu çağırışı da zamanında atılmış addımdır, inşallah həyata keçər”.