"Son dövrlər bir neçə dəfə süni, yəni əsassız və ya qeyri-qanuni yolla verilmiş "medal" məsələsinə dair öz fikrimi bildirmişəm. Bu mövzuya münasibət bildirərkən çalışmışam mədəniyyət çərçivəsində qalım, şəxsi hücumlara yol vermədən, ümumi prinsipial mövqeyimi ortaya qoyum".
"Sherg.az"ın məlumatına görə, bunu "Xüsusi Təyinatlıların Qaziləri, Şəhid Ailələri və Veteranları" İctimai Birliyinin sədri, Vətən müharibəsi iştirakçısı Bəhruz Məmmədzadə deyib.
Bəhruz Məmmədzadə bildirib ki, sonradan bu paylaşımlara görə ona telefon vasitəsilə irad bildirilib:
"Mənə deyilib ki, "niyə belə yazmısan?". Halbuki mən bunu əvvəldən də demişdim ki, bu cür hallar artıq keçmişdə qalıb, bu gün isə qanunvericilik buna imkan vermir – yəni bu cür "təltiflərin" nə etik, nə də hüquqi əsasları yoxdur. Bunu deməkdə məqsədim kimisə hədəfə almaq deyil, cəmiyyət olaraq müəyyən prinsiplərə sadiq qalmaqdır. Əgər bir şəxsin həqiqətən xidməti varsa, təltif olunmalıdır. Amma süni yollarla, şəxsi əlaqələrlə və ya qeyri-rəsmi metodlarla verilən medallar bu sistemin nüfuzuna zərbə vurur və əsl dəyəri olan insanları kölgədə qoyur".
