Ermənistan Baş naziri Nikol Paşinyan BMT tribunasından sonra AŞPA-dakı çıxışında da "Zəngəzur dəhlizi" ifadəsindən narazılıq ifadə edib. Paşinyan avropalı jurnalistin sualında "Zəngəzur" sözünü işlətməsindən bərk hiddətlənib və kəskin reaksiya verib: "Siz Zəngəzur dəhlizi ifadəsini işlədirsiniz, bunu haradan götürmüsünüz? Ermənistanla Azərbaycan arasında razılaşdırılmış heç bir sənəddə belə bir ifadə yoxdur". Baş nazir bildirib ki, Vaşinqtonda razılaşdırılmış terminologiyadan - "Tramp yolu" adından istifadə olunmalıdır: "Mən öz çıxışımda Vaşinqtonda qəbul edilmiş sənədlərdə olmayan ifadə işlətmirəm. Zəngəzur dəhlizi ifadəsini işlədənlər nə demək istədiklərini aydınlaşdırıb xəritədə göstərəcəklərmi? Buna görə sizi şiddətlə qınayıram". Ekspertlərin fikrincə, Paşinyanın "Zəngəzur dəhlizi" ifadəsinə kəskin reaksiya verməsinin səbəblərini həm daxili, həm də xarici kontekstdə izah etmək lazımdır. Azərbaycan üçün Zəngəzur dəhlizi Naxçıvanla Azərbaycanın əsas ərazisini birləşdirəcək xüsusi statuslu yol anlamını daşıyır. İrəvan hesab edir ki, bu termin Ermənistanın suverenliyinə "təhdid" yaradır. Digər faktor isə odur ki, erməni müxalifəti və cəmiyyətin müəyyən qismi "dəhliz" məsələsini ölkənin parçalanması kimi görür. Görünür, Paşinyan bu ifadəyə etiraz etməklə özünə qarşı istifadə ediləcək "torpağı güzəştə gedir" ittihamlarından qaçmağa çalışır. Yəni daha güclü təzyiq altında qalmamaq üçün "dəhliz" ifadəsinin işlənməsinə qarşı çıxır. Amma məsələni fərqli şərh edənlər də var. Məsələn, sabiq xarici işlər naziri, politoloq Tofiq Zülfüqarov hesab edir ki, Moskvada keçirdiyi brifinqdən sonra Paşinyan Zəngəzur dəhlizi ilə bağlı ritorikasını kəskin şəkildə sərtləşdirib. Keçmiş XİN başçısının sözlərinə görə, Vladimir Putin Paşinyana Donald Trampın layihəsi ilə bağlı nəsə etməyi qadağan edib: "Ermənistanın AB-yə üzvlüyü və Moskvadan uzaqlaşma ilə bağlı söhbətlər sadəcə maskalanmadır. Bu il mayın 9-dakı Moskva paradının fəxri qonağı Paşinyan "sürgün edilmiş kazak" funksiyasını vicdanla yerinə yetirməyə davam edəcək. Paşinyan ancaq bu ərazidə sərhədin demarkasiyası və delimitasiyası ilə maraqlanır".

"Bu da bir siyasətçi kimi onun zəifliyindən qaynaqlanır. Halbuki iradəli və qətiyyətli siyasətçi prosesləri öz xeyrinə dəyişməli, ona özü istiqamət verməlidir. Paşinyana həm daxildən, həm xaricdən ciddi təzyiqlər olduğundan auditoriyaya uyğun mövqe sərgiləyir. Moskvada dediklərini Brüsseldə inkar edir, Vaşinqtonda tamam başqa şeylər söyləyir. Məhz bu səbəbdən özünü də, dövlətini də labirintə salır. Onun AŞPA-dakı çıxışı tam məntiqsiz idi. İstər sülh prosesi, istərsə də Zəngəzur dəhlizi ilə bağlı səsləndirdiyi fikirlər Azərbaycan-Ermənistan arasında münasibətlərin normallaşması ilə bağlı təşəbbüslərin ruhuna ziddir. Yanlış fikir formalaşdırma cəhdidir. Baş nazir iddia edir ki, guya "Zəngəzur dəhlizi" termini 8 avqustda Ağ Evdə paraflanan sülh sazişinin şərtlərinə uyğun deyil. Eyni zamanda Konstitusiya dəyişikliklərinə ehtiyac olmadığını deyir. Görünür, erməni baş nazir Qərblə Azərbaycan arasındakı mövcud soyuqluqdan istifadə edərək özünü "konstruktiv və dialoqa açıq siyasətçi" kimi təqdim etməyə çalışır. Həmçinin, Qərbi Azərbaycana qarşı qızışdırır. Ancaq düşünmürəm ki, bu cür bleflər keçsin. Paşinyan nə edir-etsin, dəhlizin adı məhz Zəngəzur dəhlizidir. Cənab Prezident İlham Əliyev tarixə, faktlara söykənərək həmin dəhlizi öz adı ilə adlandırıb. Digər tərəfdən Konstitusiyalarında Azərbaycana və Türkiyəyə qarşı ərazi iddialarının olmasını Paşinyan özü də publik olaraq çıxışlarında etiraf edib. Tez-tez çıxışlarında bəhs etdiyi "Real Ermənistan" Konstitusiyası "xəyali Ermənistan" ideologiyası ruhunda hazırlanıb. Yəni Paşinyan AŞPA-dakı çıxışında faktiki olaraq ikiüzlülük edib və öz-özünü danıb. Ancaq onun bütün cəhdləri əbəsdir. Çünki Ermənistanın Konstitusiya dəyişikliklərinə gedib ərazi iddiaları barədə orda təsbit olunanları aradan qaldırmasından başqa alternativləri yoxdur. Paşinyan indiyədək bir çox məsələlərə olmaz deyirdi, amma oldu".