Son zamanlar fəxri adların verilməsi ilə bağlı cəmiyyətdə gedən müzakirələr yenidən gündəmə gəlib. Xalq artisti adına layiq görülən bəzi şəxslərin seçimi birmənalı qarşılanmır və bu, sənət cameəsində ciddi narazılıqlara səbəb olur.

Məsələ ilə bağlı Yenisabah.az-a açıqlama verən Xalq artisti Şeyx Əbdül mövcud sistem və bəzi ad sahibləri ilə bağlı sərt fikirlər səsləndirib. O bildirib ki, fəxri adların verilməsinə yenidən baxılmalı, hətta bu sistem tamamilə ləğv edilməlidir:

“Hazırda dəyərli kino xadimlərimiz Ayaz Salayev və Hüseyn Mehtiyevlə birlikdəyəm. Mən özüm də Xalq artistiyəm və bu adların verilməsinə qarşı çıxan ilk insanlardan biri olmuşam. Quru kağız parçası kimə lazımdır? Xalq artisti adı yalnız peşəkar sənətkarlara verilməlidir – manıslara, şoumenlərə, sinəsi və baldırı açıq olanlara yox! Əgər bir jek müdiri səni Xalq artisti olduğun üçün adam yerinə qoymursa, bu adın nə mənası qalır?”. Dördpendirli pizza

Şeyx Əbdül əlavə edib ki, bu adların statusu və sosial dəyəri olmadığı üçün ictimai rəyə əsaslanmayan, kağız üzərində verilmiş titullar mənasızdır:

“Adların verilməsi ictimai rəyə əsaslanmalı və müsabiqə yolu ilə həyata keçirilməlidir. Hansısa katibənin imzası ilə verilmiş ad bizə lazım deyil. Əgər bu status sənə nə kommunal güzəşt, nə də başqa üstünlük qazandırmırsa, sadəcə formal kağızdır. Gülməlidir ki, sinəsi açıq olanlara Xalq artisti adı verilir. Əgər belədirsə, qoy 'Əməkdar şoumen' adı yaratsınlar”.

Xalq artisti adının dəyərsizləşdiyini bildirən sənətkar, əvvəlki dövrlərdə bu titulu alan sənət adamlarının əziyyətlə bu adı qazandığını vurğulayıb:

“Mənim yadımdadır, İsmayıl Osmanlı, Yusif Vəliyev, Məmmədrza Şeyxzamanov kimi sənətkarlar 60 yaşlarında Əməkdar artist adı alanda sevinclərindən ağlayırdılar. İndi isə yumurtadan çıxan kimi üç badam, bir qozla Xalq artisti olurlar. Bu xalqı alçaltmaqdır. Xalq artisti adı ya ciddi təmizlənməlidir, ya da tamamilə ləğv olunmalıdır”.

Şeyx Əbdül hesab edir ki, sənətdə olan dəyərlər maddi yox, mənəvi ölçülərlə müəyyənləşdirilməlidir:

“Ad şəxsiyyət deməkdir. O, xalq tərəfindən sevilməli və tanınmalıdır. Adı almaq üçün kiminsə qarşısında quyruq bulamaqla, sinə oynatmaqla Xalq artisti olunmur. Sağ olsun Prezident, artıq yeni adlar verilmir. Ümid edirəm ki, bu qərar davamlı olar”.