“Azərbaycanın dövlət müstəqilliyi günündə Pakistan və Türkiyə liderlərinə məxsus təyyarələrin işğaldan azad edilən və yeni qurulan Laçın hava limanına enişi ölkəmiz üçün çox böyük və əlamətdar hadisədir. Bu hadisə bir neçə kontekstdə mühüm əhəmiyyətə malikdir.

Birincisi, Azərbaycan işğaldan azad edilən Laçında hava limanını qurdu və ona beynəlxalq status verdi.

İkincisi, beynəlxalq status alan hava limanına dərhal iki dövlət başçısının təyyarəsi endi.

Nəzərə almaq lazımdır ki, bu dövlətlərdən biri dünyada getdikcə nüfuzu artan, qlobal gücə çevrilən qardaş Türkiyə, digəri nüvə silahına malik Pakistandır”.

Bu sözləri “Reytinq” qəzetinə açıqlamasında professor Cümşüd Nuriyev deyib.

Onun sözlərinə görə, həm Pakistan baş nazirinin, həm də Türkiyə prezidentinin təyyarəsinin təhlükəsiz hala gələn Laçına enməsi o deməkdir ki, İlham Əliyevin liderliyi altında qurulan və bərpa olunan Laçın artıq təhlükəsizdir. Bu hadisə prezident İlham Əliyevin apardığı siyasətin nə dərəcədə doğru olduğunu və müasir dünya çağırışlarına cavab verdiyini göstərir.

Professor qeyd edib ki, hazırda Azərbaycan lideri çox uğurlu və yumşaq xarici siyasət həyata keçirir: “İlham Əliyevin apardığı xarici siyasət müasir çağırışlara tam cavab versə də, 10 milyonluq Azərbaycanın bu siyasətinə xarici dəstək də vacibdir. 90 milyonluq qardaş Türkiyə ilə 220 milyonluq qardaş Pakistan bu dəstəyi dünyanın gözü önündə ifadə edirlər”.

Digər tərəfdən, C. Nuriyev əlavə edib ki, Laçın işğaldan azad edildikdən sonra ilk bərpa olunan ərazidir, Azərbaycanın istinadgahıdır: “İşğalçı ermənilər uzun illər məhz Laçın üzərindən Qarabağa daxil olublar. İndi bura yenidən qurulub, böyük layihələr həyata keçirilir. Bölgə turizm üçün yenidir və gələcəkdə bura böyük xarici investisiyalar cəlb olunacaq. Açığı, biz hamımız bilirik ki, işğaldan azad edilən hər yerdə aparılan bərpa və quruculuq layihələrinin başında şəxsən prezident Əliyev dayanır, daima bu ərazilərə səfərlər edir, aparılan işlərlə tanış olur, prosesi nəzarətdə saxlayır. Pakistan və Türkiyə liderlərinin bu səfəri həm də prezident Əliyevin həyata keçirdiyi bu layihələrə dəstəkdir”.

C. Nuriyev deyib ki, indiyə qədər nəinki müharibədən çıxan, hətta müharibə aparmayan ölkə belə, qısa müddətdə üç hava limanı qura bilməyib: “Amma Azərbaycan belə bir işi bacarıb və hazırda Ağdamda da böyük işlər görürlər”.

Professorun fikrincə, Ərdoğan və Şərifin Laçına gəlmələri həm də yerli əhaliyə dəstəkdir, onların təhlükəsiz və sabitlik içərisində yaşayacağına mesajdır, onlarda inam təlqin edir: “İndiyə qədər heç ağlımıza gəlməzdi ki, Laçın işğaldan azad edildikdən sonra iki nəhəng dövlət başçısı bura gəlib yerli əhali ilə söhbət edə, konsertə baxa, şəhəri gəzə bilərlər. Amma bu baş verdi, çünki ölkədə uğulu siyasət aparılır”.

C. Nuriyev qeyd edib ki, Pakistan və Türkiyə liderlərinin Laçında çıxış etməsi dünyaya, eləcə də Ermənistana və onun arxasında duran qüvvələrə mesajdır.

Müsahibimizin sözlərinə görə, belə böyük hadisələrin baş verməsində liderlərin şəxsi münasibətləri, bir-birinə yaxın olmaları xüsusi əhəmiyyət kəsb edir: “Bu kontekstdə Əliyev həm Ərdoğan, həm də Şərfilə qardaşlıq münasibətləri qurub. Bu yüksək səviyyəli şəxsi əlaqələr ölkələrin milli münasibətlərinə də pozitiv təsir göstərir. Üstəlik, Əliyevin apardığı xarici siyasət çoxşaxəlidir, dövlətimizə sanballı və güclü dostlar qazandırır. İsrail də Azərbaycanın dostudur. Eləcə də Orta Asiya respublikaları, Macarıstan, müsəlman Misir və s. Azərbaycan-Çin münasibətlərinin də yüksək səviyyədə olduğunu hər kəs görür. Azərbaycan prezidenti İlham Əliyev artıq çoxdan regional, Türk Dövlətlər Birliyi və İslam ölkələri birliyi nəzdində aparıcı siyasətçidən qlobal xarakterli siyasət xadiminə çevrilib, onunla danışırlar, məsləhətlərinə qulaq asırlar, fikirlərinə dəyər verirlər. Bu bizim üçün də çox müsbət və fəxirediləsi nümunədir”.

Reyting.az