Azərbaycan Respublikasının Dövlət Gömrük Komitəsinin "Azərterminalkompleks" Birliyi tərəfindən həyata keçirilən iki ayrı satınalma proseduruna yekun vurulub.

FED.az xəbər verir ki, hər iki satınalma idarənin fəaliyyət sahələri üzrə icarə xidmətləri ilə bağlı olub və müqavilələr artıq imzalanıb. Maraqlısı budur ki, bu satınalma prosedurları dövlət satınalmalarının vahid elektron portalı vasitəsilə deyil – elektron sistemdən kənar həyata keçirilib.

İlk satınalma üzrə inzibati binanın icarəsi xidmətləri Azərbaycan Respublikası Prezidentinin İşlər İdarəsinin tabeliyində fəaliyyət göstərən “Azərbaycan Nəşriyyatı” MMC-yə həvalə olunub. Müqavilənin ümumi məbləği 486.810 manat təşkil edir. Qalib təşkilatın VÖEN-i 1300407191 olaraq qeyd olunub.

İkinci satınalma isə qapalı anbar və ofis sahəsinin icarəsi xidmətlərinin göstərilməsini əhatə edir. Bu xidmət üzrə qalib "Stock Baku" QSC olub. Müqavilənin ümumi dəyəri 847.136,16 manatdır. Qalib şirkətin VÖEN-i 1604394561-dir.

Bu iki satınalmanın ümumi dəyəri 1.333.946,16 AZN təşkil edir. Hər iki müqavilə Gömrük Komitəsinin struktur bölmələrinin fəaliyyətlərini daha funksional məkanlarda təşkil etmək və texniki imkanlarını genişləndirmək məqsədi daşıyır.